GAZETA E LONDRES – Sylvinjo flet para sfidës me Letoninë
Trajneri i Kombëtares shqiptare, Silvinjo, ka folur 24 orë para ndeshjes së rëndësishme kualifikuese të Botërorit 2026 kundër Letonisë. Tekniku brazilian e cilësoi këtë përballje si një nga më të rëndësishmet e këtij cikli, duke theksuar se skuadra është e përgatitur për një ndeshje të vështirë, por vendimtare në ecurinë e kuqezinjve.
“Kur lufton për një vend në Kupën e Botës, rruga është gjithmonë e vështirë. Nesër kemi një ndeshje kyçe, shumë të rëndësishme. Letonia është skuadër e organizuar, fizike dhe e rrezikshme në goditjet standarte. Pamë ndeshjen e tyre me Serbinë dhe deri në minutën e fundit ishte e hapur. Nuk mund të flitet sot për fitore 5 apo 6-0, në futbollin modern gjithçka është e mundur”, u shpreh Silvinjo.
Tekniku ndaloi edhe te kritikat pas miqësores me Gjibraltarin, ku testoi disa lojtarë të rinj. “Në miqësore atmosfera është krejt ndryshe. Duhej të shihja lojtarë që kishin munguar, si Berisha, por edhe të rinj si Pajaziti, Kaçurri, Dajsinani, Simoni e Shpendi. Nuk mund të marrësh 11 lojtarë që nuk kanë luajtur kurrë bashkë dhe t’i kërkosh të bëjnë mrekulli. Pashë gjëra të mira, por edhe të këqija. Megjithatë duhet durim me këta djem të rinj, ata janë e ardhmja”, theksoi trajneri.
Në lidhje me sulmin, Silvinjo la të kuptohet se do të ketë ndryshime, por pa zbuluar formacionin. “Ndoshta do të ndryshojmë në fazën mbrojtëse dhe sulmuese. Kemi ende seancën e fundit, por patjetër do të ketë risi në formacion”, tha ai, shkruan A2 CNN.
I pyetur nëse skuadra është e vetëdijshme se ndaj Letonisë është e “dënuar të fitojë”, trajneri kuqezinjve u përgjigj me bindje: “Po, është një moment i mirë për ne, pasi gjithçka është në dorën tonë. Presion ka gjithmonë, por është më mirë kur e ke situatën në kontroll. Duhet të japim një performancë të mirë në 90 minuta dhe të tentojmë fitoren.”
Sa i përket lojtarëve kryesorë, Silvinjo dha sinjale pozitive për Brojën dhe Asanin, duke i cilësuar si elementë të rëndësishëm për skuadrën. “Janë lojtarë të mirë që na ndihmojnë, por ende nuk e kam vendosur nëse do të luajnë të dy nga fillimi. Do ta shohim nesër”, deklaroi ai.
Trajneri vlerësoi gjithashtu edhe ecurinë e skuadrës në këto dy vite e gjysmë, duke nënvizuar se Kombëtarja ka ndryshuar shumë. “Kombëtarja është e hapur, kush është në formë të mirë, vjen te ekipi. Kjo është arsyeja pse kemi sjellë disa të rinj që po tregojnë potencial”, shtoi ai.
I pyetur nëse kjo sfidë mund të jetë një “finale” edhe për të si trajner i kuqezinjve, Silvinjo shmangu polemikat. “Unë nuk mendoj për këtë. Çdo ndeshje është e rëndësishme kur kërkon Botërorin. Edhe ajo në Riga ishte e tillë. Futbolli është i paparashikueshëm, ndaj fokusi im është vetëm te fitorja nesër”, përfundoi tekniku brazilian.
