KMA NEWS / Kanë shkaktuar një valë protestash disa vendime të marrë nga Erion Veliaj, i cili ka vetëm prej 8 muaj i ulur në karrigen e kryetarit të Bashkisë. Katër të tilla u zhvilluan javën e shkuar kundër ndërtimit të parkut të lojërave brenda parkut të Liqenit Artificial, rritjes së taksës me 15 herë për biznesin, për sipërfaqet publike dhe për skandalin e mbifaturimit të ujit të pijshëm. Në dy raste, shoqëria civile dhe PD prishën rrethimin brenda parkut të liqenit. Protesta e tretë u zhvillua para Bashkisë dhe ajo kundër mbifaturimeve të UKT pati për protagonist edhe Ministrin e Brendshëm, Saimir Tahiri, i cili iu bashkua qytetarëve. Shoqëria Civile do të protestojë sot sërish për të njëjtën arsye. Protesta do të zhvillohet te parku dhe para Bashkisë. Partia Demokratike ka njoftuar qytetarët për një tubimqë do të mbahet ditën e nesërme para zyrës së Veliajt, kundër rritjes së taksave, abuzimeve me faturat e ujit, rritjes së biletës së urbanëve dhe kundër betonizimit të Parkut të Liqenit Artificial. Të martën është radha e biznesit të vogël, që do të mblidhet para Bashkisë për të kundërshtuar rritjen e taksës me të paktën 15 herë për sipërfaqet publike. Kjo është hera e parë kur ndaj një kryebashkiaku të Tiranës ka patur kaq shumë protesta brenda një kohe të shkurtër. /Lapsi.al