KMA NEWS / Deputeti i Partisë Socialiste, Ben Blushi do të nisë që nesër një tur takimesh nëpër gjithë vendin. Takimet ku veç Blushit do të marrin pjesë deputetë të tjerë të PS dhe ish-drejtues të forumeve të partisë do të kenë në qendër të vëmendjes zhvillimet e fundit në PS.
Kjo lëvizjeje e re brenda partisë tashmë ka dhe një emër: “Shqipërinë mbi partinë”. Takimi i parë mësohet se do të zhvillohet nesër në qytetin e Beratit në orën 18:00. Nga Lëvizja e re brenda PS, janë shpërndarë ftesat me logon “Shqipëria mbi partinë”. Së bashku me Blushin pritet që në takimin me qytetarët do të jenë edhe deputetja Mimoza Hafizi, ish-deputeti Marko Bello dhe figura të tjera politike.
Gjatë takimit, Ben Blushi do të shprehë pikëpamjet e tij mbi situatën e PS dhe referendumin që u zhvillua më 9 prill. Deri tani, deputetja Mimoza Hafizi është një nga mbështetëset e Ben Blushit. Ndërkohë që edhe deputetë të tjerë pritet ti bashkohen kësaj lëvizje. Blushi ka kritikuar mbajtjen e referendumit të 9 Prilli, por edhe mënyrë sesi po qeveris sot Partia Socialiste. Ai ka folur për një qeverisje më të efikase.
