GAZETA E LONDRES – Aleatët evropianë të Ukrainës: Pa Kievin nuk ka paqe
Aleatët kryesorë evropianë të Ukrainës janë rreshtuar sërish fuqishëm në mbështetje të Kievit, duke theksuar se çdo marrëveshje paqeje me Rusinë duhet të përfshijë patjetër Ukrainën në tryezën e bisedimeve.
Një deklaratë e përbashkët e lëshuar nga udhëheqësit e Mbretërisë së Bashkuar, Francës, Italisë, Gjermanisë, Polonisë, Finlandës dhe Komisionit Evropian, u publikua pak para takimit të planifikuar të presidentit amerikan Donald Trump me homologun e tij rus Vladimir Putin në Alaska, të premten.
Sipas një zyrtari të Shtëpisë së Bardhë, Trump është i hapur për një takim trepalësh ku do të merrte pjesë edhe presidenti ukrainas Volodymyr Zelensky. Megjithatë, për momentin, takimi mbetet vetëm mes Trump dhe Putinit – një format që është kërkuar fillimisht nga vetë Moska.
Zelensky ka reaguar ashpër, duke paralajmëruar se çdo marrëveshje pa përfshirjen e Ukrainës do të ishte “një vendim i vdekur”. Ai ka hedhur poshtë idenë e ndonjë “shkëmbimi territoresh” si kompromis për paqen, duke theksuar se një qasje e tillë vetëm do t’i jepte Rusisë pozita më të favorshme për të rifilluar luftën.
Ndërkohë, mediat amerikane raportojnë se administrata Trump po përpiqet të bindë aleatët që të pranojnë një marrëveshje ku Rusia do të mbante të gjithë rajonin e Donbasit dhe Gadishullin e Krimesë. Por liderët evropianë, në deklaratën e tyre, kanë qenë të prerë: “Kufijtë ndërkombëtarë nuk duhet të ndryshohen me forcë” dhe “Ukraina ka të drejtë të zgjedhë fatin e saj”.
Në prag të samitit në Alaska – takimi i parë në më shumë se tre vjet mes presidentëve të SHBA-së dhe Rusisë – tensionet diplomatike po rriten, ndërsa Kievi dhe kryeqytetet evropiane përpiqen të sigurojnë që paqja të mos negociohet mbi kurrizin e Ukrainës.
