SHQIPTARI NEWS – Ambasadorja amerikane Yuri Kim shkruan se liderët do të mbajnë përgjegjësi të plotë për të gjithë ata që garojnë nën siglën e tyre partiake.
Në një kohë kur palët politike s’po gjejnë dot dakordësi për listat e hapura, ambasadorja amerikane Yuri Kim ka lëshuar një paralajmërim të fortë.
Me anë të një statusi në rrjetet e saj sociale, Kim shkruan se liderët do të mbajnë përgjegjësi të plotë për të gjithë ata që garojnë nën siglën e tyre partiake. Gjithashtu ambasadorja amerikane shkruan të gjithë kandidatët për deputet në zgjedhjet e ardhshme parlamentare do të duhet të jenë të “vetuar” për të shkuarën e tyre.
“KUJDES: Ndërsa partitë përgatiten për zgjedhje, liderët do të mbajnë përgjegjësi për ata që garojnë nën flamurin e tyre. Ju lutemi vetoni kandidatët tuaj – mos i fyeni votuesit, mos e dëmtoni demokracinë, mos nxitni korrupsionin,”-shkruan Kim.
Në vendin tonë, deputetët plotësojnë një formular dekriminalizimi, në të cilin raportojnë të shkuarën e tyre dhe nëse kanë pasur probleme me drejtësinë. Megjithatë formulari nuk ka funksionuar gjithmonë pasi vitin e shkuar, PD-ja “hëngri kokat” e disa kryebashkiakëve socialistë që nuk ishin treguar të “sinqertë” me dekriminalizimin.
