GAZETA E LONDRES – Performancë e shkëlqyer e Armando Brojës një Yll n, shkëlqen ndaj Evertonit
Burnley u ndal në një barazim pa gola ndaj Evertonit në ndeshjen e zhvilluar sot, por përtej rezultatit, një emër spikati mbi të gjithë në fushë: Armando Broja. Sulmuesi i Kombëtares kuqezi ishte titullar dhe zhvilloi një paraqitje që i ngjante shumë Brojës së ditëve më të mira, duke dhënë sinjale të qarta se është rikthyer plotësisht në nivelin e tij.
Që në minutat e para, Broja tregoi agresivitet, forcë fizike dhe siguri me topin në këmbë. Ai fitoi një numër të madh duelesh, si në ajër ashtu edhe në tokë, duke u shndërruar në një pikë reference për repartin ofensiv të Burnleyt. Me lëvizjet e tij inteligjente, driblime elegante dhe mbajtje perfekte të topit, Broja ishte thuajse i pandalshëm, duke e bërë shumë të vështirë për mbrojtësit kundërshtarë t’ia marrin topin.
Sulmuesi shqiptar bëri gjithçka siç duhet: luftoi, krijoi hapësira, mbajti peshën e sulmit dhe i dha frymëmarrje skuadrës në momentet e vështira. Performanca e tij e bindur ishte arsyeja pse trajneri vendosi ta mbante në fushë për plot 87 minuta, një tjetër tregues i besimit maksimal që ai ka ndaj yllit kuqezi.
Megjithatë, futbolli shpeshherë di të jetë edhe i padrejtë. Për 87 minuta, Armando Broja bëri gjithçka në mënyrë perfekte, por i mungoi ajo që për një sulmues është thelbësore: shërbimi final dhe rasti i pastër për gol. Ai nuk u furnizua mjaftueshëm nga shokët e skuadrës, duke mbetur pa mundësinë për ta konkretizuar paraqitjen e shkëlqyer me gol.
Ironia e ndeshjes erdhi menjëherë pas zëvendësimit të tij. Flemming u aktivizua në vend të Brojës dhe vetëm dy minuta më vonë u gjend përballë portierit Pickford, duke goditur shtyllën. Një pozicion klasik sulmuesi, ku nëse Armando Broja do të ishte ende në fushë, me shumë gjasë do të ishte pikërisht ai protagonisti i atij rasti.
Një ndeshje pa gol në statistika, por me shumë sinjale pozitive për Brojën, i cili po dëshmon se është gati të marrë sërish rolin e liderit, si te klubi ashtu edhe me fanellën kuqezi.
