KMA NEWS / Kreu i Partisë ‘LIBRA’ Ben Blushi ka komentuar aktualitetin politik dhe takimin e dytë në presidencë mes kryeministrit Edi Rama dhe kreut të PD, Lulzim Basha për zgjidhjen e ngërçit politik.
I ftuar në emisionin “Të Paekspozuarit” të gazetarit Ylli Rakipi ne ‘News24’, Ben Blushi u shpreh i bindur se palët nuk do arrinin marrëveshje, pasi sipas tij Rama dhe Basha nuk duan një gjë të tillë, pasi po bashkëqeverisin. Ai tha se Rama nuk do marrëveshje, pasi shijon me marrëzinë e vet parlamentin që dominon, ndërsa Basha nuk do marrëveshje para Kavajës.
“Isha i bindur që nuk do kishte marrëveshje pasi është njësoj si të besosh se një peshk ecën në bar. Sot palët janë më larg se ditën që pati një draft nga PPE. Basha nuk do marrëveshje para Kavajës. Rama nuk do marrëveshje, pasi shijon me marrëzinë e vet parlamentin që dominon. LSI-në ai e do për legjitimitetin e zgjedhjeve, nuk e do për koalicion. Kjo marrëveshje që u la sot në tavolinë ishte kot. Kjo është një marrëveshje për ndërkombëtarët, jo për shqiptarët. Këta thonë se po bëjmë sikur bisedojmë, por palët nuk duan marrëveshje. Duhet të ishin diskutuar standardet zgjedhore. Palët po diskutojnë për bashkëqeverisje, pasi nëse unë të jap ministra e zëvendësministra është bashkëqeverisje. Këto parti do bashkëqeverisin pas 1 viti”- tha Blushi.
