KMA NEWS / Ministri i Jashtëm Ditmir Bushati gjatë vizitës dy ditore në Athinë, ku pati takim me homologun e tij grek Nikos Kotzias, ka zhvilluar edhe një takim ku ka bashkëbiseduar me emigrantët shqiptarë për problemet që ata kanë, si dhe ka prezantuar shërbimin e ri të Ambasadës “Konsullata online”, i cili u krijon lehtësira të[ mëdha bashkëatdhetarëve, duke u kursyer veç kohës së punës edhe shpenëzimet financiare. Bushati u deklaroi emigrantëve shiptarë se, së shpejti edhe Greqia do ta heqë vulën apostile, si dhe ka deklaruar përsa u përket problemit të mos njohjes së siguracioneve dhe patentave shqiptare, se pengesat vijnë nga pala greke, jo nga mos angazhimi i shtetit shqiptarë dhe mungesa ligjore.
“Mendoj se dy janë elementët më të rëndësishëm. I pari është shmangia e kontaktit fizik dhe shmangia e humbjes së kohës dhe shpenzimeve të mëdha financiare, sepse nuk janë thjesht tarifat që aplikon shteti shqiptar, por edhe njerëzit që lënë ditën e punës apo që u duhet të udhëtojnë për t’u paraqitur pranë konsullatave tona. Së dyti është raporti i brendshëm që ka të bëjë thjesht me integritetin e sistemit”, tha ministri Bushati.
Sa i përket kërkesës së emigrantëve për mësimin e gjuhës shqipe në Greqi për fëmijët e tyre, Bushati pranoi se qeveria nuk ka bërë sa duhet. Ai kujtoi pengesat që janë hasur nga politika greke në kufi, duke përmendur ndalimet e fundit të librave shqip.
Por Bushati deklaroi se një rol të rëndësishëm, që fëmijët e emigrantëve në Greqi të mësojnë shqip, ka luajtur presidenti i ndjerë i “Top Media”, Dritan Hoxha.
“Pika tjetër që mendoj se është jashtëzakonisht e rëndësishme dhe që u përmend këtu, ka lidhje me edukimin. Këtu miq, ne jemi deficitarë dhe unë e pranoj këtë. Në këtë pikë, më shumë ka bërë Dritan Hoxha dhe Digitalbi, sesa kanë bërë qeveritë. Për sa i përket promovimit të gjuhës dhe të identitetit tonë”, deklaroi ministri Bushati.
