GAZETA E LONDRES – “Drejtësi për çlirimtarët”: Protestë në Shkup në mbështetje të ish-krerëve të UÇK-së
Shkupi pritet të jetë sot epiqendra e radhës e protestave në mbështetje të ish-krerëve të Ushtrisë Çlirimtare të Kosovës, të cilët po gjykohen nga Dhomat e Specializuara në Hagë. Organizata e Veteranëve të Luftës së UÇK-së ka njoftuar se nga ora 13:00, në sheshin “Skënderbeu” në kryeqytetin e Maqedonisë së Veriut, do të mbahet një protestë paqësore me kërkesën për drejtësi dhe respektim të parimit të prezumimit të pafajësisë për të akuzuarit.
Megjithatë, kjo protestë po zhvillohet në një klimë tensioni dhe pasigurie, pasi Organizata e Veteranëve të Luftës së UÇK-së u ka bërë thirrje veteranëve që të mos marrin pjesë në tubim, për shkak të rrezikut të mundshëm të ndalimit të tyre nga autoritetet maqedonase. Sipas organizatës, shteti fqinj nuk ka dhënë garanci se pjesëmarrësit, veçanërisht ish-luftëtarët, nuk do të përballen me masa arrestimi apo ndalimi.
Ndërkohë, krijimi i një shtabi krize nga autoritetet maqedonase, i paralajmëruar më herët nga kryeministri Hristijan Mickoski, është vlerësuar nga Organizata e Veteranëve si i panevojshëm dhe i njëanshëm, duke theksuar se protesta ka karakter qytetar dhe paqësor.
Nënkryetari i Organizatës së Veteranëve të Luftës së UÇK-së, Gazmend Syla, ka deklaruar në një intervistë për KosovaPress se mungesa e garancive nga ana e institucioneve maqedonase ka ngritur shqetësime serioze për sigurinë e bashkëluftëtarëve që synojnë të marrin pjesë në protestë. Ai theksoi se deri më tani nuk ka pasur asnjë konfirmim zyrtar se veteranët nuk do të arrestohen apo ndalohen gjatë qëndrimit të tyre në Maqedoninë e Veriut.
Megjithatë, Syla ka siguruar se protesta në Shkup pritet të jetë madhështore, pasi organizatorët kanë marrë konfirmime për pjesëmarrje të gjerë nga diaspora shqiptare, si dhe nga Shqipëria dhe Lugina e Preshevës.
Protesta e sotme në Shkup është e pesta me radhë në kuadër të tubimeve që po mbahen në mbështetje të ish-krerëve të UÇK-së, të cilët ndodhen në paraburgim në Hagë. Protesta e parë u mbajt më 7 gusht të këtij viti në Prishtinë, për t’u pasuar nga tubime në Hagë, Tiranë dhe së fundmi në Strasburg.
Ish-krerët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi, ndodhen në paraburgim në Hagë që nga nëntori i vitit 2020. Që të katër kanë deklaruar pafajësinë e tyre ndaj akuzave të ngritura nga Zyra e Prokurorit të Specializuar.
Sipas aktakuzës, ata akuzohen për krime kundër njerëzimit dhe krime lufte, akuza të cilat mbeten në proces gjyqësor dhe për të cilat mbrojtja ka kundërshtuar vazhdimisht bazën dhe provat e paraqitura nga prokuroria.
