GAZETA E LONDRES – Fatmirësisht asnjë shqiptar i lënduar nga tërmeti në Turqi
Ministrja për Evropën dhe Punët e Jashtme i ka ofruar Turqisë ndihmën e Shqipërisë pas tërmetit shkatërrues që shkaktoi qindra viktima dhe ka lënë mijëra qytetarë të lënduar apo nën rrënoja.
Në një postim në Twitter, Olta Xhaçka ndërsa i drejtohet homologut të saj në Turqi Mevlut Cavusoglu shprehet se lutjet e shqiptarëve shkojnë për viktimat e tërmetit shkatërrues.
Sakaq, ambasada shqiptare në Turqi thotë se deri tani nuk ka inflamacione për shqiptarë të prekur nga tërmeti.
Ambasadori shqiptar në Turqi, Kastriot Robo në një lidhje telefonike për News24 pohoi se deri më tani nuk raportohet për shqiptarë në mesin e viktimave si pasojë e një tërmeti të fuqishëm që godit këtë vend.
Robo tha se nga komunikimet e tij në terren, nuk raportohet që të ketë shqiptarë të prekur.
“Fatmirësisht në zonën e Ankarasë nuk u ndje. Ne, stafi i ambasadës, i Konsullatës shqiptare jemi mirë dhe të sigurt. Ishte tërmet shkatërrues, përveç fuqisë së madhe, zgjati shumë në kohë. Kam komunikuar menjëherë pasi ndodhi tërmeti, me shtetas turq, me kombësi shqiptare. Fatmirësisht nuk ka humbje njerëzit për komunitetin shqiptar që jeton në ato zona. Prezenca e shqiptarëve në ato zona është e limituar, krahasuar me zona të tjera. Kemi komunikim permanent. Nuk rezulton se ka problem deri tani.”, tha ambasadori shqiptar.
Kujtojmë se një tërmet i fuqishëm me magnitudë 7.4 Rihter u regjistrua në orët e para të mëngjesit në Turqi duke shkaktuar qindra viktima dhe të plagosur, si dhe dëme kolosale materiale.
Lëkundja kryesore ndodhi rreth orës 02:16, ndërkohë që epiqendra ka qenë në provincën juglindore të Gaziantep, në kufi me Sirinë.
Deri në këto momente raportohet për mbi 500 viktima dhe mijëra të lënduar, ndërkohë që dëmet janë të pallogaritshme.
Pas tërmetit të 26 nëntorit, Turqia dërgoi në Shqipëri një avion Airbus Atlas me 28 persona për operacionet e kërkim-shpëtimit, tre makineri dhe një total prej 500 batanijesh dhe 500 pakosh me ushqime për viktimat e tërmetit.
