KMA NEWS / Nëpërmjet një njoftimi për mediat, Gjykata Kushtetuese ka hedhur poshtë lajmin se ka anuluar vendimin e dënimit me burgim të përjeshtëm të kreut të “Bandës së Lushnjes” Aldo Bare.
Gjykata Kushtetuese ditën e sotme ka vendosur pranimin pjesërisht të kërkesës, pra shfuqizimin si të papajtueshëm me Kushtetutën e Republikës së Shqipërisë të vendimit të Kolegjit Penal të Gjykatës së Lartë të datës 2 Korrik 2015, që do të thotë se kjo gjykatë do të dërgojë çështjen për rishqyrtim në Gjykatën e Lartë.
Në njoftimin për mediat thuhet se aktualisht çështja ndodhet në fazën procedurale të shpalljes të vendimit, dhe menjëherë pas shpalljes, vendimi do të jetë në dispozicion të palëve në proces dhe publikut.
Sipas njoftimit, vendimi i saj nuk ka prekur vendimarrjen e Gjykatës së Shkallës së Parë dhe të Apelit për Krimet e Rënda, ku rezulton se “i forti i Lushnjes” është dënuar me burgim të përjetshëm.
