KMA NEWS / Gjykata Kushtetuese ka vendosur të shfuqizojë vendimin për dënim me burgim të përjetshëm për Aldo Baren, ish-kreun e bandës së Lushnjes.
Mësohet se Kushtetuesja ka gjetur një sërë shkeljesh në dosjen e tij, prandaj e ka rikthyer çështjen penale sërish në Gjykatën e Lartë. Bare akuzohet për disa vrasje që nga viti 1999 deri në vitin 2005.
Nuk dihet nëse ky vendim i Kushtetueses do t’i hapë rrugë lirimit nga burgu të Aldo Bares, sikundër u lirua Lul Berisha, ish-kreu i bandës së Durrësit, apo sikundër u shpallën të pafajshëm të akuzuarit e organizatës Hakmarrja për Drejtësi.
Gjykata Kushtetuese nuk e ka zbardhur ende vendimin për dosjen e Alfred Shkurtit, i njohur me nofkën Aldo Bare.
Kush është Aldo Bare, ish efektivi i forcave speciale që formoi bandën famëkeqe të Lushnjes
Ka qenë një nga efektivët më të mirë të Repartit Special 326. Pas ndryshimeve në vend, në vitin 1990, Bare largohet nga trupat speciale dhe emri i tij do të harrohej deri në verën e vitit 1997.
Pas vrasjes së të vëllait të tij, Ramadan Shkurti, zë fill edhe Banda e Lushnjës dhe krimet e saj. Akuza: Krijimin e organizatës kriminale, 15 vrasje, për rrëmbim personi, shkatërrim prone, dhunim varresh, kryerje veprash penale në bashkëpunim nga organizata kriminale, vendosjes së eksplozivit në stadiumin e Lushnjës, për vendosjen në 2001 të eksplozivit në banesën e inspektorit të policisë, Idriz Shuli, për vrasjen në janar të vitit 2005 të Klodian Haxhiut, vendosje e eksplozivëve në mars të 2005 në një apartament në rrugën “Don Bosko” në Tiranë, për vrasjen në korrik 2005 të Baki Taullahut dhe për një numër vrasjesh të tjera.
Ndërkohë Zanafilla e “Bandës së Lushnjës” nis aty nga viti 1997. Gjithçka nisi pas një sherri mes Aldo Bares dhe Artur Dajës, pas një bisede telefonike mes dy miqve. Grindja mes tyre nuk do të mbaronte vetëm me një mbyllje telefoni.
Sipas prokurorisë, Aldo Bare qëllon ndaj Artur Dajës, duke e plagosur, por vdes në vend një shoku i këtij të fundit, Genci Kashari. Por në këtë shkëmbim zjarri mes palëve ka mbetur i vdekur vëllai i Aldos, Ramadan Shkurti.
Pas ngjarjes, trupat e të vrarëve Ramadan Shkurti dhe Bardhyl Rabia janë mbajtur peng për një kohë të gjatë nga Artur Daja, që nuk ka lejuar marrjen e kufomave nga familjarët e tyre.
Për t’u hakmarrë për të vëllanë e tij, Aldo Bare (Alferd Shkurti) krijoi bandën e armatosur, duke përfshirë edhe persona të tjerë të akuzuar në këtë proces. Kjo bandë ka pasur 15 anëtarë.
Ndërkohë që tre nga të dyshuarit si anëtarë të së ashtuquajturës “banda e Lushnjës” janë vrarë, përkatësisht Gentian Kulla, Edison Xhafaj, Leonard Prifti.
Por mes tyre ka edhe një të penduar të drejtësisë. Ndihmësi i drejtësisë shqiptare ka rrëfyer në seancat gjyqësore të gjitha historitë e krimeve të kryera nga kjo bandë si dhe të gjithë emrat e anëtarëve që kanë shkrepur këmbëzën e pistoletës, apo butonin e lëndës eksplozive, raporton Ora News.
Është i vetmi nga 15 pjesëtarët e “familjes së madhe” që ka kontribuar për të zbardhur të gjitha misteret e krimeve që mban mbi supe kjo bandë.
