GAZETA E LONDRES – Komisionerja e BE-së vlerëson progresin e Shqipërisë drejt anëtarësimit
Komisionerja për Zgjerimin e Bashkimit Evropian, Marta Kos, ka vlerësuar përparimin e Shqipërisë në rrugën drejt integrimit evropian, duke e cilësuar atë si një arritje të jashtëzakonshme. Në një postim në platformën X, Kos thekson se rezultatet e fundit janë dëshmi e qartë e angazhimit të fortë politik dhe aspiratave të shoqërisë shqiptare për t’u bërë pjesë e familjes evropiane.
“Shqipëria ka bërë përparim të paparë. Ky rezultat i jashtëzakonshëm është një njohje e qartë e angazhimit të fortë politik të Shqipërisë dhe aspiratave të shoqërisë së saj për në BE”, shkruan Kos.
Sipas saj, viti 2025 ka qenë veçanërisht i rëndësishëm për procesin e zgjerimit të BE-së, duke theksuar se Shqipëria, Mali i Zi, Ukraina dhe Moldavia janë dalluar për reformat dhe progresin e bërë gjatë vitit të kaluar.
Komisionerja shton se vendet kandidate kanë objektiva ambicioze për të përfunduar negociatat e anëtarësimit dhe se viti i ardhshëm do të jetë “moment i së vërtetës” për të matur realisht ecurinë e tyre drejt Bashkimit Evropian.
