GAZETA E LONDRES – Kosova në finalen e “play-off”-it për FIFA World Cup 2026 pasi mposhti Sllovakinë
Përfaqësuesja e Kosovës ka shkruar një nga faqet më të bukura të historisë së saj, duke triumfuar me rezultatin spektakolar 3-4 në transfertë ndaj Slovakisë, në gjysmëfinalen e “play-off”-it për FIFA World Cup 2026.
Ndeshja nisi menjëherë me emocione, pasi vendasit kaluan në avantazh që në minutën e 5-të me anë të Martin Valjent, i cili realizoi me kokë për 1-0. Megjithatë, reagimi i Kosovës ishte i shpejtë dhe i vendosur. “Dardanët” morën kontrollin e lojës dhe arritën të barazojnë në minutën e 20-të me një supergol nga distanca të Veldin Hoxha, duke rikthyer ekuilibrin në 1-1.
Sllovakia tentoi të rikthehej në avantazh dhe ishte pranë golit në minutën e 36-të, por goditja e Lukáš Haraslín u ndal nga shtylla. Gjithsesi, i njëjti lojtar nuk gaboi në fundin e pjesës së parë, kur në minutën e 44-t realizoi nga goditja e lirë për rezultatin 2-1, duke dërguar vendasit në avantazh në pushim.
Pjesa e dytë nisi në mënyrën më të mirë për Kosovën. Vetëm pak minuta pas rifillimit, Fisnik Asllani barazoi shifrat në 2-2 me një goditje të fuqishme me kokë pas një kërcimi spektakolar. Ky gol i dha zemër skuadrës kosovare, e cila vazhdoi të sulmonte me intensitet të lartë.
Në minutën e 59-të erdhi edhe përmbysja e madhe, kur Florent Muslija realizoi një gol fantastik nga goditja e dënimit për 2-3. Kosova nuk u ndal me kaq dhe në minutën e 71-të vulosi fitoren me anë të Kreshnik Hajrizi, i cili përfitoi nga një rrëmujë në zonë për të çuar topin në rrjetë dhe për të çuar rezultatin në 2-4.
Në minutat shtesë, David Strelec ngushtoi diferencën në 3-4, por ishte tepër vonë për vendasit. Kosova arriti të administrojë minutat e fundit dhe të sigurojë një fitore historike që e dërgon në finalen e “play-off”-it.
Tashmë, gjithçka do të vendoset më 31 mars në stadiumin Fadil Vokrri Stadium në Prishtinë, ku Kosova do të përballet me Turqinë për një vend në finalet e Botërorit 2026. Një sfidë vendimtare, ku “Dardanët” synojnë të vazhdojnë ëndrrën historike drejt një kualifikimi të parë në Kupën e Botës.
