SHQIPTARI NEWS – Kryeministrat e Polonisë, Republikës Çeke dhe Sllovenisë zhvilluan një takim me Presidentin e Ukrainës Volodymyr Zelenskyy në Kiev të martën, në shenjë mbështetjeje për vendin e sulmuar nga Rusia edhe pse bombardimet janë afruar pranë qendrës së qytetit.
Kryeministri i Polonisë, Mateusz Morawiecki, shkroi në median sociale mbrëmjen e së martës se ai, Zëvendëskryeministri Jaroslaw Kaczynski dhe liderët çekë dhe sllovenë ishin në Kiev.
“Këtu, në Kievin e shkatërruar nga lufta, po shkruhet historia. Pikërisht këtu, liria lufton kundër botës së tiranisë. Këtu, e ardhmja e të gjithë neve varet në balancë”, shkroi zoti Morawiecki në rrjetin Twitter.
Kjo simbolizon mbështetjen e fortë për Ukrainën, ndërsa udhëtimi i gjatë me tren nga Polonia në Kiev dërgoi mesazhin se pjesa më e madhe e vendit ende mbetet në duart e Ukrainës.
Presidenti Zelenskyy postoi një video në Facebook ku shihet i ulur rreth një tavoline me udhëheqësit dhe disa zyrtarë të tjerë duke i informuar ata për zhvillimet e luftës. Ai shprehu mirënjohje për vizitën e tyre, duke e quajtur atë një “dëshmi të fuqishme mbështetjeje”.
Udhëheqësit e Polonisë, së bashku me Kryeministrin Petr Fiala të Republikës Çeke dhe Kryeministrin Janez Jansa të Sllovenisë, thanë se ishin në një mision të BE-së. Por zyrtarët nga blloku 27 anëtarësh këmbëngulën se treshja e kishte ndërmarrë udhëtimin në mënyrë të pavarur.
Kryeministrat polakë, çekë dhe sllovenë janë kthyer në Poloni pas vizitës së tyre në Kiev, tha një zëdhënës i qeverisë polake.
“Delegacionet polake, sllovene dhe çeke u kthyen shëndoshë e mirë”, shkruan Piotr Muller në Twitter.
Udhëheqësit, të shoqëruar nga kreu i partisë qeverisëse të Polonisë, Ligj dhe Drejtësi, Jaroslaw Kaczynski, udhëtuan për në Kiev me tren në shenjë solidariteti me Ukrainën dhe ishin të parët që vizituan kryeqytetin ukrainas që nga fillimi i luftës.
