KMA NEWS / Përfundon takimi i Bashës me aleatët, unanimisht pro djegies së mandateve
Ka përfunduar takimi prej 60 minutash midis kryetarit të Partisë Demokratike Lulzim Basha me partitë aleate, konkretisht me kreu i LZHK-së Dashamir Shehi, kreu i Partisë Republikane Fatmir Mediu, kreu i PBDNJ, Vangjel Dule si dhe kreu i PDK-së Nard Ndoka.
Në një prononcim për mediat, krerët e partive aleate u shprehën në mbështetje të vendimit për djegien e mandateve.
Kryedemokrati Basha njoftoi se aleatët, ashtu si edhe deputetët e PD janë gati të djegin mandatet
“Ky sot ishte takim pune, vendimi per djegien e mandateve është vendim i opozitës së bashkuar”, tha Basha
Fillimisht Basha zhvilloi takim rreth 60 minuta me kryetaren e LSI, Monika Kryemadhi në ambientet e selisë blu dhe me pas ka zhvilluar takim edhe me aleatët e vegjël të PD.
Fatmir Mediu: Qëndrimi i përbashkët:
Pas takimit, Kreu i PR-së, Fatmir Mediu tha se aleatët janë gati të djegin mandatet duke iu bindur kështu urdhrit të qytetarëve shqiptarë që protestuan e që nuk e duan më Ramën kryeministër.
“Ne kemi koalicion politik të hershëm, për këtë vendim kemi besimin e qytetarëve që na treguan se Rama nuk mund ta qeverisë më vendin. Dalim me një qëndrim të përbashkët, besoj që do jetë vendim unanim. Mendoj që është në të mirën e vendit, duhet qeverisje që i përgjigjet interesave të vendit, jo interesave klanore”,- tha ai.
Vangjel Dule: Opozita është në kushtet e realizimit të misionit të saj. Një mision që nuk mbaron me djegien e mandateve. Ky koalicion opozitar është ai që drejton popullin, mbështetet nga populli për të sjellë ditën e nesërme, shtetin e së drejtës, demokraci funksionale, integrimin në BE. Misioni është i vështirë, i rëndë dhe kërkon mbështetje më shumë se kurrë.
Nard Ndoka: Në fakt kryetarët folën qartë. Në fakt ata folën edhe për mandatin e kryeministrit, ai duhet ta lexojë qartë mesazhin e qytetarëve.
Dashamir Shehi: Sa kohë të jetë Rama aty, aty do na shifni bashkë. Kjo punë është e mbyllur. Ato mandate s’na bëjnë ndonjë vlerë të madhe. Do bëhemi dhe më shumë.
Agron Duka: Unë jam për zgjidhje institucionele, por përderia përderisa opozita ka marrë vendimin për djegien e mandateve, ne do i djegim, nuk do hymë në parlament.
Pas deklaratës së aleatëve të Partisë Demokratike, Bashën tha përpara gazetarëve se opozita ka marrë një vendim për t’ju bindur urdhërit të qytetarëve që u derdhën në shesh.
Sipas tij sot Parlamenti nuk është më legjitim, Edi Rama nuk është më kryeministër, dhe kjo është shkaku që mblodhi dje qytetarët në shesh.
“Edi Rama nuk mund të ofrojë zgjidhje sepse është i kapur nga krimi dhe oligarkët dhe këta nuk e lënë atë që të ofrojë zgjidhje. Mbajeni vëmendjen, ju ftoj se keni edhe ju përgjegjësinë tuaj, do të ketë një të ardhme për shqiptarët dhe ne jemi të vendosur për t’jua dhënë këtë të ardhme sepse ajo nuk i përket krimit dhe oligarkëve por qytetarëve”.
Gjatë ditës së sotme Basha ka deklaruar zyrtarisht se grupi parlamentar vendosi të djegë mandatet duke numëruar arsyet që çuan në këtë vendim.
Ndërkaq grupi i PD ka autorizuar Bashën të ndjekë hapat e mëtejshëm.
Takimi ka qëllim diskutimin e hapave të mëtejshëm.
Do të jetë Këshilli Kombëtar i PD-së i cili do të marrë vendimin përfundimtar lidhur me djegien e mandateve.
