GAZETA E LONDRES – LDK në Londër në Mobilizim të Plotë: Diaspora Bashkohet Rreth Vizionit të Ri Politik
Ndërsa Kosova po përgatitet për zgjedhjet e jashtëzakonshme parlamentare, kryesia e degës së Lidhja Demokratike e Kosovës në Londër, nën drejtimin e kryetarit të saj, Semi Sylejmani, ka zhvilluar një mbledhje të rëndësishme në kuadër të mobilizimit për fushatën zgjedhore.
Në këtë takim, përveç anëtarëve të kryesisë, ishte e pranishme edhe kandidatja për deputete, Brikena Muharremi. Të pranishmit zhvilluan diskutime të gjera mbi situatën aktuale politike në Kosovë, duke analizuar sfidat dhe pritshmëritë e zgjedhjeve, si dhe duke shqyrtuar mënyrat për një organizim sa më dinjitoz, profesional dhe të fuqishëm, me synimin për të arritur një rezultat pozitiv për LDK-në.
Kryetari i degës së LDK-së për Mbretërinë e Bashkuar, z. Sylejmani, prezantoi para kryesisë kandidaten nga Londra, avokaten Brikena Muharremi, kandidaturë e cila është pritur me entuziazëm të madh nga komuniteti shqiptar në Mbretërinë e Bashkuar. Mbështetja për të nuk vjen vetëm nga anëtarët dhe simpatizantët e LDK-së, por edhe nga elektorati gri, si dhe nga shqiptarë me bindje të ndryshme politike. Edhe shqiptarët nga Shqipëria, ndonëse pa të drejtë vote në Kosovë, e kanë mirëpritur kandidaturën e saj, duke e konsideruar një përfaqësuese dinjitoze të diasporës shqiptare.
Entuziazmi për kandidaturën e saj ndihet kudo ku jetojnë e punojnë shqiptarët në Britaninë e Madhe në kafene, restorante, qendra pune dhe ambiente komunitare, pasi avokatja Muharremi njihet si një figurë e respektuar dhe me kontribut të vyer në mbrojtjen e të drejtave të shqiptarëve dhe në promovimin e imazhit të tyre në shoqërinë britanike.
Brikena Muharremi nuk shihet thjesht si një kandidate formale në garë, por si zëri i shqiptarëve të diasporës në Mbretërinë e Bashkuar. Ajo ka dëshmuar aftësi të forta organizative dhe lidershipi, duke kontribuar në forcimin e identitetit shqiptar dhe në mbrojtjen e interesave të komunitetit. Ajo është themeluesja e parë e Shoqatës së Avokatëve Britaniko-Shqiptarë në Londër, të cilën vazhdon ta drejtojë edhe sot, duke përfaqësuar një rrjet prej rreth 200 avokatësh shqiptarë dhe britanikë.
E shkolluar dhe e formuar profesionalisht në Mbretërinë e Bashkuar, me një profil perëndimor dhe përvojë të gjerë juridike ndërkombëtare, shumë shqiptarë në diasporë besojnë se ajo është një nga figurat më të përshtatshme për të përfaqësuar Kosovën në Kuvend. Përkrahësit e saj shpresojnë se, falë profesionit dhe përvojës së saj juridike, përfshirë angazhimet në çështje ndërkombëtare, ajo do të jetë një zë i fuqishëm në mbrojtje të interesave kombëtare shqiptare dhe në përpjekjet për drejtësi ndaj ish-udhëheqësve të Ushtrisë Çlirimtare të Kosovës që po përballen me procese gjyqësore në Hagë.
Nga ana tjetër, LDK-ja duket se po synon të afrojë rreth vetes figura me vizion modern dhe formim perëndimor, si Brikena Muharremi apo Kreshnik Çollaku, i njohur për përvojën e tij politike dhe diplomatike në SHBA. Mbetet për t’u parë se sa do të arrijë politika shqiptare të shtrihet dhe të përfshijë potencialin intelektual të diasporës, e cila përbën një vlerë të rëndësishme kombëtare dhe një urë lidhëse mes shqiptarëve dhe botës perëndimore.
