GAZETA E LONDRES – Mbretëria e Bashkuar prezanton skemën e re të Identitetit Dixhital
Nga Mimoza CACA, Londër
Kryeministri Keir Starmer ka shpallur nisjen e një skeme të re Identiteti Dixhital (Digital ID) për qytetarët dhe banorët ligjorë të Mbretërisë së Bashkuar, e cila do të bëhet e detyrueshme për verifikimin e së drejtës për punë (Right to Work) deri në fund të këtij mandati parlamentar.
Qeveria thotë se kjo nismë do të ndihmojë në luftimin e punësimit të paligjshëm dhe njëkohësisht do t’u lehtësojë qytetarëve aksesin në shërbimet publike si lejet e drejtimit, përfitimet sociale, kujdesin për fëmijët dhe regjistrimet tatimore. Identiteti do të ruhet në telefonat mobil, ngjashëm me aplikacionin e NHS ose pagesat pa kontakt.
Sipas Kryeministrit, kjo masë do të shërbejë si pengesë për emigrantët e paligjshëm që kërkojnë punë në Britani, duke ndaluar një nga “faktorët tërheqës” kryesorë që nxit kalimet e rrezikshme me gomone. Ai shtoi se sistemi dixhital ofron siguri më të lartë për të dhënat personale, duke përdorur enkriptim modern dhe autentifikim biometrik.
Skema do të shoqërohet me konsultime publike dhe programe mbështetëse për personat që nuk përdorin smartphone, duke marrë shembuj nga vende si Estonia, Danimarka apo Australia, ku sistemi i ID dixhitale ka sjellë përfitime të mëdha.
Qeveria britanike e cilëson këtë nismë si një hap të rëndësishëm në planin e saj për kontrollin e kufijve, reduktimin e punës së paligjshme dhe rritjen e sigurisë kokombëtare.
Ndërsa uddhëheqësa e opozitës, Kemi Badenoch, ka thënë se ka argumente “pro dhe kundër” identifikimit dixhital, por shtoi se bërja e tij e detyrueshme “kërkon një debat të mirëfilltë kombëtar”.
Në një postim në X të enjten, ajo akuzoi Starmer se kishte bërë “një njoftim të panevojshëm për konferencën” për të shpërqendruar vëmendjen nga ngjarjet e tjera në Downing Street – duke përfshirë spekulimet rreth Andy Burnham që kandidon për rolin e udhëheqësit të Partisë Laburiste .
“A mund t’i besojmë vërtet asaj për të zbatuar një program të kushtueshëm kombëtar që do të ndikojë në jetën e të gjithëve dhe do të vendosë barrë shtesë mbi njerëzit që zbatojnë ligjin? Dyshoj,” tha ajo.
Por, edhe aktivistët e privatësisë nuk janë të kënaqur me identifikimet dixhitale – po pse?
Nuk është për t’u habitur që aktivistët e privatësisë janë të zemëruar për këtë njoftim.
Grupi i të Drejtave të Hapura thotë se kjo rrezikon “ta kthejë Mbretërinë e Bashkuar në një shtet para krimit ku na duhet vazhdimisht të vërtetojmë se kush jemi për të vazhduar jetën tonë të përditshme”. Big Brother Watch e quajti këtë “Orwellian”.
Por për çfarë shqetësohen në të vërtetë grupet e privatësisë?
Shqetësimi i madh është mbikëqyrja masive – ideja se nëse krijoni një bazë të dhënash për të gjithë ata që jetojnë në një vend, e bën më të lehtë të shikoni se çfarë po bëjnë njerëzit – megjithëse nuk e dimë nëse kjo skemë e identifikimit dixhital do të nënkuptonte një bazë të dhënash të vetme.
Të tjerë thonë se shqetësimi nuk është se çfarë do të bëhet aktualisht me informacionin, por se si ai mund të keqpërdoret potencialisht nga ndonjë qeveri e panjohur në të ardhmen.
Një shqetësim tjetër i madh është siguria kibernetike. Këtë vit është parë një seri sulmesh kibernetike të profilit të lartë që kanë shkaktuar ndërprerje masive të prodhimit në M&S dhe Co-op, si dhe kanë bërë që prodhimi të ndalet në mënyrë të menjëhershme në Jaguar Land Rover.
Thënë thjesht, disa aktivistë janë të shqetësuar se infrastruktura do të jetë një objektiv për hakerat. Por është e pamundur të thuhet nëse të dhënat e njerëzve do të jenë në rrezik – kjo do të varet nga sa i sigurt do të jetë sistemi.
Më herët ishte thënë se dokumenti i identitetit do të ishte i detyrueshëm vetëm për ata që duan të “vijnë në këtë vend dhe të punojnë”, duke shtuar se “nuk po e parashikohet për asnjë moment që kjo do të jetë e detyrueshme” për qytetarët e Mbretërisë së Bashkuar.
