GAZETA E LONDRES – Mërgata kosovare voton në Londër: Proces i qetë dhe me pjesëmarrje të lartë
Për herë të dytë radhazi, konsullatat e ambasadave të Republikës së Kosovës janë shndërruar në qendra votimi për mërgimtarët, duke u dhënë atyre mundësinë të ushtrojnë të drejtën kushtetuese të votës për zgjedhjet e përgjithshme, të cilat do të mbahen nesër, më 28 dhjetor, për zgjedhjen e anëtarëve të rinj të Kuvendit të Kosovës.
Në këtë kuadër, votimi në Ambasadën e Republikës së Kosovës në Londër ka përfunduar me sukses, duke shënuar një pjesëmarrje shumë të lartë. Sipas të dhënave zyrtare, mbi 86% e votuesve të regjistruar në Mbretërinë e Bashkuar kanë marrë pjesë në procesin e votimit, çka dëshmon interesimin dhe angazhimin e vazhdueshëm të diasporës kosovare në proceset demokratike të vendit.
Procesi i votimit është zhvilluar në mënyrë të rregullt dhe transparente, pa u shënuar asnjë incident, qoftë edhe i vogël. Komisionerët zgjedhorë kanë konfirmuar se gjithçka ka kaluar sipas procedurave ligjore dhe standardeve të përcaktuara nga Komisioni Qendror i Zgjedhjeve.
Sipas informacioneve të siguruara nga komisionerët në Ambasadën e Kosovës në Londër, votimi është organizuar në dy dhoma të posaçme votimi, duke garantuar rrjedhshmëri, rend dhe fshehtësi të votës për çdo qytetar.
Procesi zgjedhor është vlerësuar pozitivisht edhe nga përfaqësuesit politikë. Përfaqësuesi i Lidhjes Demokratike të Kosovës (LDK) ka deklaruar se zgjedhjet kanë qenë të lira dhe të rregullta. Kryetari i LDK-së për Mbretërinë e Bashkuar, z. Semi Sylejmani, është shprehur optimist për rezultatin e partisë së tij, duke theksuar se pret një rezultat pozitiv në përfundim të zgjedhjeve. Ai ka shtuar se ekzistojnë pritshmëri reale për krijimin e një qeverie të re, përmes një koalicioni të formuar nga partitë e opozitës së mëparshme.
Pjesëmarrja e lartë dhe zhvillimi i qetë i procesit në Londër konsiderohen si një tregues i rëndësishëm i rolit aktiv që diaspora kosovare vazhdon të luajë në jetën politike dhe demokratike të Kosovës, duke kontribuar drejtpërdrejt në vendimmarrjen për të ardhmen e vendit.
