KMA NEWS / Ministri i Shtetit për Çështjet Europiane të Republikës Federale të Gjermanisë, Micheal Roth, ka vlerësuar reformat e realizuara nga Shqipëria.
Në një konferencë të përbashkët për shtyp pas takimit me Ministrin e Jashtëm, Ditmir Bushati, zyrtari i lartë gjerman tha se këto reforma jo vetëm e afrojnë Shqipërinë me Europën, por i shërbejnë dhe gjeneratave të ardhshme.
Roth: Reforma në drejtësi është një ngjarje thelbësore. Ligji i vettingut është një sukses jo vetëm për Shqipërinë por edhe për të gjitha vendet e Bashkimit Europian. Këto reforma të ndërmarra kohët e fundit, sigurisht që e sjellin Shqipërinë më pranë Bashkimit Europian, por ato janë gjithashtu edhe në interes të brezave dhe gjeneratave më të reja për të cilat ne kemi nevojë që ky vend të shkojë përpara dhe të bëjë progres, qoftë në këndvështrimin social, ekonomik dhe demokratik.
Ndërsa për Ministrin Bushati nuk ka asnjë dyshim se hapja e negociatave lidhet drejtëpërdrejtë me zbatimin e ligjit të vettingut.
Bushati: Duhet të zbatojmë sa më shpejt të jetë e mundur me cilësi dhe profesionalizëm ligjin e vettingut që pritet të kalojë në sitë gjyqtarë dhe prokurorë shqiptarë, një reformë e cila ne besojmë se do të ketë një efekt spirale edhe sa i përket fushave të tjera.
Në takimin kokë më kokë, dy bashkëbiseduesit diskutuan edhe sa i përket situatës në rajon, politikës së jashtme të ndjekur nga Shqipëria në adresimin e disa sfidave me rëndësi.
