SHQIPTETARI NEWS / Ministria e Shëndetësisë iu është përgjigjur akuzave të Partisë Demokratike për tenderin 3.5 milionë dollarë të maskave. Në një reagim zyrtar, MSh sqaron se PD po shpif por, procedurat për blerjen e maskave janë të gjitha të bazuara në ligj. Ministria i bën thirrje PD të mos hedhë më baltë mbi punën e specialistëve, ndërsa i bën thirrje organeve të drejtësisë të hetojnë gjithçka që mund të duket e dyshimtë për të bërë transparencë.
REAGIMI I PLOTË:
Në përgjigje të akuzave të rradhës dhe të strategjisë së njohur të Partisë Demokratike “shpif, shpif se dicka do mbetet”, kësaj rradhe në drejtim të Ministrisë së Shëndetësisë dhe Mbrojtjes Sociale, për masat e shpejta që u morën për mbrojtjen e personelit shëndetësor, sqaron për publikun se procedurat për blerjen e materialeve të mbrojtjes personale për mjekët dhe infermierët gjatë kësaj epidemie, janë zhvilluar duke zbatuar legjislacionin në fuqi.
Ministria e Shëndetësisë dhe Mbrojtjes Sociale i kërkon edhe një herë Partisë Demokratike të mos hedhë baltë mbi punën dhe sakrificën e specialistëve që punojnë ditë e natë në këtë ministri, në garë me kohën për të siguruar çdo mjet të nevojshëm në këtë luftë, që personeli mjekësor të jetë i mbrojtur dhe të punojë me standarde. Ministrisa e Shëndetësisë është e hapur për çdo hetim nga organet e drejtësisë, një orë e më parë!
Ministria e Shëndetësisë ka siguruar dhe do të vazhdojë të sigurojë – duke zbatuar ligjin dhe vetëm ligjin – mjetet e mbrojtjes personale për personelin mjekësor në këtë situatë pandemie, sepse prioritet i yni është mbrojtja e shëndetit të mjekëve, infermierëve dhe stafeve mbështetëse që ndodhen në vijën e parë të zjarrit, në këtë krizë të paprecedent.
Partia Demokratike ka denoncuar sot tenderin e Ministrisë së Shëndetësisë për blerjen e maskave mbrojtëse. Enkelejd Alibeaj dhe Albana Vokshi, kanë akuzuar MSh se ka bërë një tender ku blihen dyfish çmimit të tregut maskat. Një maskë, e blerë nga Vokshi me çmim 4 mijë lekë të vjetra në farmaci, për të cilën kishte edhe kuponin tatimor, nga MSH është blerë me vlerën 8 mijë lekë të vjetra. Ndërkohë që akuza nga Alibeaj, është se vjedhja sipas demokratëve është bërë me dijeni. Alibeaj tha se qeveria i ka zhdoganuar maskat me 3 euro dhe pastaj i ka blerë me 8 mijë lekë copën, ose me rreth 6.5 euro. Kompanitë e favorizuara sipas PD janë FARMA NET dhe EUROMED.
Partia Demokratike vazhdon të këmbëngul në lidhje me denoncimin e bërë nga ana e tyre. Në një tjetër reagim zyrtar, Opozita shkruan që Ministria duhet të japë thjesht një përgjigje referuar vlerës që kanë paguar për të blerë maskat dhe vjeshjet mbrojtëse. Sipas PD-së, Ministria e Shëndetësisë i ka blerë maskat me 8 mijë lekë të vjetra copën, ndërsa në farmaci shiten me 4 mijë lekë. Përsa u përket veshjeve, PD-ja shkruan se Ministria i ka blerë me 28 euro, kur në treg kushtojnë tre herë më pak, dhe se për këtë kërkojnë një përgjigje.
Reagimi i plotë i PD-së
Sa herë kapet në vjedhje, në vend të transparencës, qeveria sulmon opozitën. Ministria e Shëndetësisë nuk jep asnjë shpjegim për blerjen me dyfish çmimin e tregut të pajisjeve mjekësore antiCOVID. Nuk është koha e sulmeve bajate politike, qeveria duhet të japë përgjigje konkrete me një Po ose një Jo të thjeshtë.
1. A bleu qeveria 178 mijë maska me 8 mijë lekë copën, kur në farmaci ato kushtojnë 4 mijë lekë?
2. A bleu qeveria veshje spitalore me 28 euro, kur në treg kushtojnë gati 3 herë më pak, 9.6 euro?
3. A bleu qeveria, mbrojtëse për sytë me dyfishin e çmimit të tregut, nga 2.9 euro i bleu me 6 euro copën?
Qytetarët presin përgjigje për këto pyetje. Ata nuk duan të degjojnë akuza dhe sulme banale politike, por kërkojnë të vërtetën e kontratave që qeveria i ka klasifikuar si sekret shtetëror. Në vend të fjalëve boshe, Edi Rama duhet të bëjë diçka fare të thjeshtë: të publikojë kontratën e blerjes së këtyre materialeve! Pastaj qytetarët gjykojnë vetë kush thotë të vërtetën dhe kush vjedh!
