KMA NEWS / Shkrimtari dhe poeti i njohur shqiptar, Dritëro Agolli, ndërroi jetë sot në moshën 86 vjeçare pas mjekimeve të vazhdueshme nga sëmundjet e mushkërive. Shkrimtari ishte i shtruar në spitalin Shqfqet Ndroqi në Tiranë prej disa ditësh për shkak të gjendjes së rënduar shëndetësore.
Agolli është një nga krijuesit më me ndikim në letërsinë dhe kulturën shqiptare pas Luftës së Dytë Botërore, me mbi 5 dekada krijimtari dhe një seri të gjatë botimesh me lirika, proza e drama.
Ai ishte për shumë vite kryetar i Lidhjes së Shkrimtarëve dhe Artistëve gjatë regjimit komunist, gazetar i shtypit të asaj kohe, dhe deputet për afro 3 dekada në tranzicionin mes dy sisteme politike.
Agolli është i njohur për lirikat e ndjera të dashurisë njerëzore dhe atdhetare, kushtuar njeriut dhe vendlindjes.
Ndër romanet e tij më të spikatura, mes shumë prozave të tjera, janë “Shkëlqimi dhe rënia e shokut Zylo” dhe “Trëndafili në gotë”.
Krijimtaria e tij është botuar e ribotuar shpesh në Shqipëri, Kosovë dhe shtete të tjera nga vitet 60 e deri sot.
Është fitues i disa çmimeve dhe i nderimeve të tjera. Disa prej veprave më të rëndësishme të tij janë përkthyer në Perëndim e në Lindje.
Shumë vepra të tij janë luajtur në skena të dramës dhe në filma artistikë.
Dritëro Agolli krijoi pa u ndalur poezi e prozë gjithë jetën e tij qysh nga adoleshenca e viteve 50 dhe deri në muajt e fundit kur sapo botoi edhe vëllimin e fundit me lirika “Prit edhe pak”, 2016.
Dritëro Agolli lindi në Menkulas të Devollit. Mësimet e para i morri në vendlindje, vazhdoi gjìmnazin e Gjirokatrës, një shkollë me mjaft traditë. Studimet e larta për letërsi i mbaroi në Petërburg. Karrierën e nisi si gazetar.
Dritëro Agolli hyri që në fillim në letërsinë shqiptare (vitet’60) si një protagonist i saj, duke i ndryshuar përmasën e së ardhmes.
