KMA NEWS – Nga sot të gjitha shërbimet publike do të ofrohen online, mjafton vetëm një klik
Nga sot nuk do të ketë më sportele dhe çdo shërbim publik do të ofrohet online. Njoftimi i bërë nga kryeministri Edi Rama, pak ditë më parë, nis nga e hëna zbatimin.
Një ditë më parë kreu i qeverisë rikujtoi se 30 prilli ishte “afati i fundit i sporteleve fizike në Shqipëri dhe prej të hënës nis koha e re e shërbimit të dokumentave vetëm online, duke e futur Shqipërinë në grupin e vendeve më të përparuara në shërbimet publike digjitale”.
Kryeministri Edi Rama, kishte njoftuar se qytetarët do të kursejnë kohë, do të shmangin radhën dhe po ashtu i japin fund edhe korrupsionit në këmbim të një shërbimi të caktuar.
“Shteti vjen te ti me një klik. Shpëtim i madh edhe ky nga radhët e nga streset dhjetëra vjeçare për një vërtetim pensioni apo për të tjera dokumente sigurimesh shoqërore, të cilat tani i merr nga shtëpia çdo shqiptar, në Shqipëri apo në emigracion. Tanimë shteti vjen tek qytetari, nuk shkon më qytetari tek shteti”, kështu shprehej kryeministri Rama më herët.
