GAZETA E LONDRËS – Reagim publik i Jordan Dacit, Jurist dhe kandidatit për Gjykatën Kushtetuese
Juristi dhe kandidati për Gjykatën Kushtetuese, Jordan Daci, ka reaguar publikisht pas publikimit të emrit të tij në listën e propozuar të kandidatëve për Këshillin Kombëtar të Partisë Demokratike. Në një deklaratë zyrtare, ai sqaron se nuk është anëtar i Partisë Demokratike, nuk ka shprehur asnjëherë vullnet për të kandiduar në strukturat e saj dhe nuk ka pasur dijeni për një propozim të tillë. Daci thekson se angazhimi i tij aktual lidhet ekskluzivisht me kandidimin për Gjykatën Kushtetuese dhe se i qëndron parimeve të pavarësisë, paanësisë dhe mospërfshirjes në veprimtari politike. Më poshtë, deklarata e plotë e tij:
DEKLARATË PUBLIKE
Në lidhje me një informacion të bërë publik së fundmi, sipas të cilit emri im rezulton i propozuar si kandidat për Këshillin Kombëtar të Partisë Demokratike, ndjej detyrimin të sqaroj me korrektësi dhe qetësi se nuk jam anëtar i Partisë Demokratike, nuk kam paraqitur asnjë kërkesë, pëlqim apo shprehje vullneti për të kandiduar në strukturat e saj, dhe nuk kam pasur dijeni paraprake për një propozim të tillë.
Duke ruajtur respektin për çdo qytetar apo strukturë që mund të ketë vlerësuar emrin tim, si dhe duke falënderuar cilindo propozues që mund të ketë vepruar me mirëbesim, më duhet të shprehem qartë se nuk pajtohem me përfshirjen e emrit tim në këtë proces dhe kërkoj që ai të mos konsiderohet si shprehje e vullnetit tim personal, profesional apo publik.
Aktualisht, zgjedhja ime institucionale dhe profesionale është e lidhur me kandidimin për gjyqtar në Gjykatën Kushtetuese të Republikës së Shqipërisë. Për këtë arsye, i qëndroj me përgjegjësi të plotë parimeve kushtetuese të pavarësisë, paanësisë, integritetit dhe mospërfshirjes në veprimtari politike, të cilat janë thelbësore për çdo kandidat që synon t’i shërbejë vendit në një funksion të tillë të lartë kushtetues.
Ky sqarim nuk synon të krijojë debat publik, polemikë apo keqkuptim politik, por vetëm të shmangë çdo interpretim të pasaktë mbi pozicionin tim. Unë nuk kam qenë dhe nuk jam pjesë e këtij procesi politik, dhe emri im nuk duhet të përdoret apo të interpretohet si shenjë përkatësie, mbështetjeje apo angazhimi partiak.
Do të vijoj me seriozitet, përulësi dhe përgjegjësi rrugën institucionale të kandidimit për Gjykatën Kushtetuese, me bindjen se, nëse organet përkatëse të emërtesës do të më besojnë këtë detyrë, do t’i shërbej Republikës së Shqipërisë vetëm mbi bazën e Kushtetutës, ligjit, pavarësisë dhe interesit publik.
Jordan Daci
