GAZETA E LONDRES – Sondazhi i amerikanëve: Bie besueshmëria tek Albin Kurti, ngritje e hovshme për PDK dhe LDK
Matjet e fundit se ku qëndrojnë partitë politike tregojnë ndryshime të mëdha në përkrahjen e tyre nga qytetarët.
Një sondazh i fundit i realizuar nga organizata amerikane Instituti Demokratik Ndërkombëtar (NDI), tregon se Lëvizja Vetëvendosje ka pësuar një rënie të madhe në besueshmëri.
Sondazhi, i cili është realizuar këtë muaj, pavarësisht se e ka vendosur të parën Lëvizjen Vetëvendosje të kryeministrit Albin Kurti, ka treguar se partia në pushtet ka një rënie prej rreth 14 për qind nga rezultati i zgjedhjeve parlamentare të 14 shkurtit 2021.
Vetëvendosje do t’i fitonte 36 për qind të votave, bazuar në sondazhin e NDI, rezultatet e së cilit i ka siguruar Paparaci.
Ngritje të hovshme rezulton të kenë shënuar dy partitë opozitare, Partia Demokratike e Kosovës (PDK) dhe Lidhja Demokratike e Kosovës (LDK).
Bazuar në matjet e NDI-së, PDK-ja ka dal partia e dytë me përkrahje. Partia që e nominoi si kandidat për kryeministër kryetarin e Mitrovicës, Bedri Hamzën do të merrte 26 për qind të votave në zgjedhjet nacionale, sipas sondazhit.
Ngritje në këtë matje ka shënuar edhe LDK-ja, e cila figuron të jetë partia e tretë me 24 për qind.
Edhe AAK-ja, e cila në zgjedhjet e fundit nacionale fitoi pak mbi 7 për qind të votave, ka rezultuar me rritje në matjet e NDI. Sipas sondazhit të organizatës amerikane, AAK-ja del të jetë partia e katërt me rreth 10 për qind.
Instituti Demokratik Ndërkombëtar është një organizatë jo-qeveritare amerikane e cila përkrahet nga Agjencisë Amerikane për Zhvillim Ndërkombëtar (USAID) dhe fondacione të tjera ndërkombëtare. NDI rregullisht merret me matje të opinionit rreth përkrahjes për subjektet politike.
Në zgjedhjet e fundit nacionale, LVV-ja e kishte marrë saktësisht atë që dëshironte. Rezultati përfundimtar e nxori atë të parën me mbi 50 për qind. 49 për qindëshin tjetër ua kishte lënë të gjitha partive të tjera bashkë.
Në këto zgjedhje, PDK-ja doli e dyta me 17 për qind.
Derisa LVV-ja po shënonte rezultatin më të thellë ndonjëherë në zgjedhje, LDK-ja doli me më së paku vota në historinë e saj.
LDK-ja që atëherë udhëhiqej nga Isa Mustafa mori 12.7 për qind të votave. Ndërkaq, AAK-ja kishte marrë 7.1 për qind të votave.
