SHQIPETARI NEWS – Ditën e sotme qeveria u ka dhënë liridalje pensionistëve dhe prindërve me fëmijët deri në 14 vjeç. Për pensionistët liridalja do të jetë deri në orën 10:00, ndërsa për prindërit dhe fëmijët nën moshën 14 vjeç do të jetë nga ora 11:00 paradite deri në orën 17:30 të pasdites. Ndërsa të gjitha aktivitetet edhe për ditën e sotme do të janë të mbyllura në të gjithë vendin.
Ndërkohë, që nga nesër hyjnë në fuqi disa masa të tjera lehtësuese, ku do të rifillojnë aktivitetin e tyre klinikat dentare, parukeritë, berberët dhe dyqanet në qendrat tregtare, por duke ruajtur distancimin social dhe me vetëm 1 klient apo pacient në radhë.
Kryeministri Edi Rama njoftoi para disa ditësh se pas 11 majit do të mbeten në zonën e kuqe bashkitë Tiranë, Durrës, Fier, Shkodër, Kurbin, Krujë, dhe në këto zona do të jetë në fuqi i njëjti regjim oraresh. Ai theksoi se këto zona do të blindohen me postblloqe dhe nuk do të lejohet hyrje-dalja e automjeteve të paautorizuara. Sipas tij e gjitha pjesa tjetër e vendit do të jetë e gjelbër dhe do të lejohet qarkullimi ndërqytetas me automjet privat deri në orën 21.00 të mbrëmjes.
