GAZETA E LONDRES – Takimi i kryeministrit britanik Starmers, Presidentit Macron, Kancelarit Scholz dhe Presidentit Biden në Gjermani
Nga Mimoza CACA, Londër
Kryeministri britanik Kier Starmer u takua sot në Berlin të Gjermanisë me Presidentin Emmanuel Macron të Francës, kancelarin Olaf Scholz të Gjermanisë dhe Presidentin Joseph R. Biden Jr të Shteteve të Bashkuara të Amerikës.
Udhëheqësit dënuan luftën e vazhdueshme të agresionit të Rusisë kundër Ukrainës, diskutuan planet e tyre për t’i ofruar Ukrainës ndihmë shtesë të sigurisë, ekonomike dhe humanitare, duke përfshirë shfrytëzimin e të ardhurave të jashtëzakonshme të aseteve sovrane të palëvizshme ruse – siç u vendos në Samitin e G7, diskutuan Planin e Fitores së Presidentit Zelenskyy, dhe përsëritën vendosmërinë e tyre për të vazhduar mbështetjen e Ukrainës në përpjekjet e saj për të siguruar një paqe të drejtë dhe të qëndrueshme, bazuar në të drejtën ndërkombëtare, duke përfshirë Kartën e Kombeve të Bashkuara, dhe respektimin e sovranitetit dhe integritetit territorial.
Udhëheqësit diskutuan gjithashtu ngjarjet në Lindjen e Mesme, në veçanti implikimet e vdekjes së Yahya Sinwar, i cili mban përgjegjësinë për gjakderdhjen e sulmit terrorist të 7 tetorit, për nevojën imediate për të sjellë pengjet në shtëpi te familjet e tyre, për t’i dhënë fund luftës në Gaza dhe të sigurojë që ndihma humanitare të arrijë te civilët e pafajshëm.
Udhëheqësit përsëritën gjithashtu qëndrimin e tyre për sulmin përshkallëzues të Iranit ndaj Izraelit dhe koordinuan përpjekjet për ta mbajtur Iranin përgjegjës dhe për të parandaluar përshkallëzimin e mëtejshëm. Ata diskutuan situatën në Liban dhe ranë dakord për nevojën për të punuar drejt zbatimit të plotë të Rezolutës 1701 të KS dhe një rezolute diplomatike që lejon civilët në të dy anët e Linjës Blu të kthehen të sigurt në shtëpi.
Konflikti brutal në Gazë u bë pjesë e vizitës shtetërore të së premtes, ndërsa u njoftua se forcat izraelite kishin vrarë udhëheqësin e Hamasit, një nga arkitektët e sulmit të 7 tetorit në Izrael që shkaktoi luftën. Shtetet e Bashkuara e kanë cilësuar Hamasin grup terrorist.
Menjëherë pas zbritjes nga avioni në Gjermani, të enjten vonë, Presidenti amerikan Biden foli lidhur me vrasjen e udhëheqësit të Hamasit, Yahya Sinwar, duke thënë se ishte një “ditë e mirë për botën”.
“Tani është koha për të ecur përpara”, tha ai. “Të shkohet drejt një armëpushimi në Gazë. Të sigurohemi që të ecim në drejtimin e duhur për ta bërë situatën më të mirë për të gjithë botën. Është koha që kjo luftë të përfundojë dhe pengjet të kthehen në shtëpitë e tyre”.
Presidenti Biden tha se do të dërgonte Sekretarin e Shtetit Anthony Blinken në Izrael për të diskutuar planet për të ardhmen.
“Presidenti beson se me vrasjen e Sinwar-it dje, ka një mundësi unike këtu që të gjithë ne ta shfrytëzojmë për të parë se çfarë mund të bëjmë për t’i dhënë fund luftës dhe për të arritur një armëpushim. Ende besojmë për një armëpushim në veri, por besojmë se armëpushimi në Gazë është më i rëndësishëm për të mundësuar kthimin e pengjeve”.
Presidenti gjerman, Frank-Walter Steinmeier, i cili e dekoroi Presidentin Biden me Urdhrin Gjerman të Meritës, foli mbi rëndësinë e vizitës së udhëheqësit amerikan duke kujtuar histori nga fillimi i viteve 1980, kur një senator i ri amerikan vizitoi Bonin, kryeqytetin e shtetit të ndarë.
Duke bërë një shaka të stilit gjerman, Presidenti Steinmeier, u shpreh se burokrati që shoqëronte senatorin 40 vjeçar, tha se “kishte shumë interes për Gjermaninë” dhe arriti në përfundimin se senatori i ri mund të kishte një “të ardhme të rëndësishme politike”.
“Çfarë nënvlerësimi i jashtëzakonshëm”, tha zoti Steinmeier përpara se të fiksonte yllin e artë me 8 cepa në xhaketën e kostumit të Presidentit Biden. “Sot, ju jeni presidenti i 46-të i Shteteve të Bashkuara, dhe nën udhëheqjen tuaj, aleanca transatlantike është më e fortë dhe partneriteti ynë është më i ngushtë se kurrë”.
“Ndoshta shërbimi më i çmuar ndaj demokracisë, gjëja më e hareshme dhe më qetësuese për njerëzit është që të dinë se madje edhe njeriu më i fuqishëm në botë, në fund të fundit, është një qenie e zakonshme njerëzore”, tha presidenti gjerman.
