GAZETA E LONDRES – Tensionet Politike në Himarë: Një Vështrim mbi Kandidatët dhe Pasojat e Zgjedhjeve
Nga Kujtim VANI
Në zgjedhjet përsëritëse për kreun e bashkisë së Himarës, Partia Socialiste e Shqipërisë ka zyrtarizuar si kandidat një minoritar grek, z. Vangjel Tavos. Ky vendim vjen në një kohë kur një pjesë e opozitët po diskuton për të paraqitur si kandidat djalin e Fredi Belerit, fituesit të zgjedhjeve vendore, i cili aktualisht është në burg për blerje votash. Në këtë kontekst, përfshihen edhe çështje të ndjeshme mbi të drejtat e minoriteteve dhe marrëdhëniet shqiptaro-greke.
Fredi Beleri, një figurë kontestuese në politikën shqiptare, ka një histori të gjatë të përfshirjes në çështje që lidhen me identitetin kombëtar dhe marrëdhëniet ndëretnike. Ai është dënuar më parë për përdhosjen e simboleve kombëtare dhe është akuzuar për përfshirje në masakrën e Peshkëpisë. Pavarësisht këtyre akuzave, Greqia dhe disa qarqe opozitare në Shqipëri kanë pretenduar se ai është një i burgosur politik, duke tensionuar më tej marrëdhëniet mes dy vendeve.
Ndërkohë që socialistët kanë vendosur të mbështesin një kandidat të përkatësisë greke, pjesa opozitare po shqyrton mundësinë e kandidimit të djalit të Fredi Belerit. Ky i fundit është shqiptar me origjinë nga Tepelena, por i konvertuar në grek dhe është përdorur nga ekstremi grek për qëllime politike dhe etnike. Ndërhyrjet e Kryeministrit grek, Miqotaqis, kanë tensionuar më tej situatën, duke akuzuar qeverinë shqiptare për mosrespektim të të drejtave të minoritetit grek në Shqipëri.
Kandidimi i z. Vangjel Tavos nga socialistët ka për qëllim të dërgojë një mesazh të qartë për respektimin e të drejtave të minoriteteve. Në anën tjetër, kandidimi i djalit të Belerit nga opozita ngre pikëpyetje mbi qëndrueshmërinë e pretendimeve greke për diskriminim. Si do të reagojnë qarqet greke dhe opozita shqiptare përballë këtij zhvillimi? A do të kenë fytyrë që të vazhdojnë të protestojnë për të drejtat e tyre kur një kandidat minoritar 100% grek është përzgjedhur nga socialistët?
Me shpalljen e datës 2 gusht si dita e zgjedhjeve nga Presidenti i Republikës, situata në Himarë pritet të jetë një provë e madhe për marrëdhëniet shqiptaro-greke dhe të ardhmen e politikës lokale në Shqipëri. Vendimi i socialistëve për të kandiduar z. Vangjel Tavos dhe reagimi i opozitës do të jenë faktorë kyç në përcaktimin e kursit të ardhshëm politik të rajonit.
