GAZETA E LONDRES – Trump paralajmëron ndryshime të mëdha në Pentagon
Presidenti Donald Trump pritet të nënshkruajë disa urdhra ekzekutivë që do të eliminojnë programet mbi diversitetin, barazinë dhe gjithëpërfshirjen në ushtri. Gjithashtu, këto urdhra do të lejojnë rikthimin në detyrë të mijëra ushtarakëve të shkarkuar për refuzimin e vaksinave kundër COVID-19 gjatë pandemisë.
Lajmi u bë publik të hënën nga Sekretari i ri i Mbrojtjes, Pete Hegseth, në një konferencë për shtyp në Pentagon, ditën e tij të parë të plotë në detyrë.
Hegseth, një ish-gazetar i Fox News dhe veteran lufte, u konfirmua në Senat me një shumicë të ngushtë, pas debatit të ashpër mes demokratëve dhe disa republikanëve.
Prioritetet dhe qëllimet e Hegseth
Në fjalën e tij, Sekretari i Mbrojtjes deklaroi se do të sjellë ndryshime rrënjësore në Pentagon, duke theksuar eliminimin e programeve mbi diversitetin dhe gjithëpërfshirjen si një ndër prioritetet kryesore.
“Më shumë urdhra ekzekutivë do të miratohen në ditët në vijim,” tha Hegseth, duke sugjeruar se administrata Trump po planifikon ndryshime të thella në strukturat e mbrojtjes.
Në hyrje të Pentagonit, Hegseth u prit nga gjenerali i Forcave Ajrore, C.Q. Brown, Shefi i Shefave të Shtabit të Bashkuar. Edhe pse Hegseth e ka kritikuar Brown në librat e tij, gjatë konferencës, ai deklaroi me shaka: “Po qëndroj pranë tij dhe mezi pres të punoj me të,” duke i vendosur dorën mbi shpatulla gjeneralit.
Shkarkime të mundshme në ushtri
Sipas raportimeve të agjencisë ‘Reuters’, pritet të ketë shkarkime të gjera në radhët e larta të ushtrisë, një mundësi që Hegseth nuk e ka përjashtuar gjatë procesit të konfirmimit në Kongres.
Emërimi i tij ka shkaktuar ndasi të thella në Senat, pasi pozita e lartë në Pentagon zakonisht u besohet kandidatëve me përvojë të thellë në menaxhimin e organizatave të mëdha dhe që gëzojnë mbështetje të gjerë dypartiake.
