GAZETA E LONDRES – Agron Malaj thyen heshtjen: “Grupi i Zjarrit nuk ka ekzistuar kurrë”/ Përgjegjësi i 21 Janarit Sali Berisha
Deputeti socialist dhe një nga kandidatët më të votuar në zgjedhjet e fundit, Agron Malaj, ka reaguar për herë të parë publikisht ndaj akuzave që lidhen me ngjarjet e 21 Janarit, ku ai është përmendur nga segmente të Partisë Demokratike si ish-komandant i të ashtuquajturit “Grupi i Zjarrit”. Malaj i cilësoi këto akuza si të padrejta dhe të motivuara politikisht, duke mohuar kategorikisht ekzistencën e një strukture të tillë.
“Prej vitesh merreni me familjen time. ‘Grupi i Zjarrit’ nuk ka ekzistuar kurrë. Ai është një shpikje e Sali Berishës. Ju jeni grupi i zjarrit. Unë kam dhënë shpjegimet e mia dhe nuk i heq asnjë presje,” – u shpreh ish-gardisti, sot deputet socialist.
Malaj theksoi se gjatë asaj periudhe ka qenë komandant i Seksionit 4, një strukturë për të cilën ka mbajtur përgjegjësi të plotë.
“Kam qenë komandant i një strukture për të cilën kam mbajtur përgjegjësi. Asnjë nga efektivët e mi nuk ka pasur gisht në 21 Janar. E keqja është se u baltos Garda. E kam për nder që kam qenë gardist, sepse e kam kryer detyrën me përkushtim,” deklaroi ai.
Në vijim, deputeti socialist iu referua edhe rezultatit zgjedhor në qarkun e Dibrës, duke akuzuar kundërshtarët për manipulime dhe duke i bërë thirrje që çështja e 21 Janarit t’i lihet drejtësisë.
“Në qarkun Dibër morët mbi 15 mijë shuplaka. Për vjedhjen e votës flisni me tuajt, me turpin e Matit dhe turpin e Dibrës që gjithë jetën janë marrë me maskarada. Lëreni 21 Janarin drejtësisë dhe ta shohim si do të dalë e vërteta,” – përfundoi Malaj.
