GAZETA E LONDRES – Deklaratë Zyrtare: Mbi ruajtjen, mbrojtjen dhe rikthimin e bustit të Heroit Kombëtar Gjergj Kastrioti Skënderbeu në Londër
Shoqata Kulturore Mati në Londër, në vijim të interesimit të saj të vazhdueshëm për ruajtjen dhe promovimin e vlerave historike, kulturore dhe kombëtare shqiptare, informon komunitetin shqiptar dhe opinionin publik mbi situatën lidhur me bustin e Heroit Kombëtar Gjergj Kastrioti Skënderbeu, i vendosur në Lady Samuel’s Gardens, Londër.
Pas konstatimit të zhvendosjes së bustit nga vendndodhja e tij, Shoqata Kulturore Mati reagoi menjëherë dhe ndërmori komunikimet e nevojshme për të sqaruar rrethanat, vendndodhjen dhe mënyrën e ruajtjes së monumentit.
Në këtë kuadër, Presidenti i Shoqatës Kulturore Mati, Kujtim Vani, njëkohësisht Drejtor i “Gazetës së Londrës”, kontaktoi përfaqësuesit përkatës të Westminster City Council, si dhe kompaninë përgjegjëse për punimet që po zhvillohen në zonën ku ndodhet Lady Samuel’s Gardens.
INFORMACIONI I MARRË DERI MË TANI
Sipas informacionit të përcjellë nga kompania përgjegjëse për punimet, busti i Gjergj Kastriotit Skënderbeut është zhvendosur përkohësisht për shkak të punimeve ndërtimore që po zhvillohen në këtë hapësirë, pra për shkak të punimeve të rizhvillimit në adresën 114–116 Queensway, pranë Lady Samuel’s Garden, ku do të ndërtohe 2 pallate 7 katëshe.
Sipas të njëjtit informacion, monumenti është vendosur në një ambient të sigurt dhe po ruhet në mënyrë profesionale gjatë periudhës së punimeve, me synimin për ta mbrojtur nga çdo dëmtim apo ndikim i mundshëm që mund të shkaktohet nga aktiviteti ndërtimor.
Gjithashtu, është bërë e ditur se zhvendosja e përkohshme është miratuar nga Westminster City Council, në kuadër të lejes së planifikimit me referencë 26/03291/FULL, e cila parashikon ruajtjen dhe rivendosjen e bustit pas përfundimit të projektit.
Sipas informacionit të marrë, punimet pritet të vazhdojnë deri në vitin 2028, ndërsa rihapja e Lady Samuel’s Gardens dhe rikthimi i monumentit në vendndodhjen e tij të mëparshme parashikohen rreth verës së vitit 2028.
Shoqata Kulturore Mati e vlerëson si element pozitiv faktin që, sipas informacionit të dhënë, rivendosja e monumentit është pjesë e kushteve të projektit dhe lejes së planifikimit.
Megjithatë, për shkak të rëndësisë së veçantë të këtij monumenti, Shoqata e konsideron të domosdoshme që informacioni i plotë mbi procedurat, kushtet e ruajtjes dhe garancitë për rikthimin e tij të jetë i dokumentuar dhe i qartë. Për të parë vendimin zyrtar të bashkisë, ku në faqen 11 ndodhet pika çër çeshtjen e bustit të Skënderbeut, kliko vendimin zyrtarë më poshtë
SKËNDERBEU – SIMBOL I HISTORISË DHE IDENTITETIT KOMBËTAR
Për komunitetin shqiptar, busti i Gjergj Kastriotit Skënderbeut në Londër nuk është thjesht një monument dekorativ apo një objekt i vendosur në një hapësirë publike.
Ai përfaqëson një simbol të historisë, identitetit, qëndresës dhe trashëgimisë kombëtare shqiptare.
Gjergj Kastrioti Skënderbeu është një prej figurave më të rëndësishme të historisë shqiptare dhe prania e tij në një prej qyteteve më të rëndësishme të botës, si Londra, ka një domethënie të veçantë për shqiptarët që jetojnë në Mbretërinë e Bashkuar.
Për këtë arsye, çdo ndërhyrje që prek monumentin duhet të trajtohet me kujdes të veçantë, përgjegjësi institucionale dhe respekt të plotë për vlerën e tij historike e kulturore.
QËNDRIMI I SHOQATËS KULTURORE MATI
Shoqata Kulturore Mati e konsideron ruajtjen e monumenteve dhe simboleve shqiptare pjesë të rëndësishme të misionit të saj.
Ne besojmë se komuniteti shqiptar në Mbretërinë e Bashkuar ka përgjegjësinë morale dhe qytetare që të kujdeset për trashëgiminë e tij kulturore dhe historike, duke bashkëpunuar në mënyrë konstruktive me institucionet britanike dhe autoritetet vendore.
Ky interesim nuk lidhet vetëm me bustin e Skënderbeut.
Ai është pjesë e një angazhimi më të gjerë të Shoqatës Kulturore Mati për ruajtjen, promovimin dhe përcjelljen e historisë, kulturës, traditave dhe vlerave kombëtare shqiptare tek brezat e rinj, veçanërisht tek shqiptarët e lindur dhe rritur në Mbretërinë e Bashkuar.
Ne besojmë se integrimi në shoqërinë britanike nuk nënkupton harrimin e origjinës dhe trashëgimisë sonë. Përkundrazi, një komunitet që respekton historinë dhe kulturën e tij kontribuon më mirë edhe në shoqërinë ku jeton.
DO TË KËRKOJMË INFORMACION ZYRTAR DHE GARANCI PËR RIKTHIMIN
Shoqata Kulturore Mati, në bashkëpunim me “Gazetën e Londrës”, do t’i drejtohet zyrtarisht Westminster City Council për të kërkuar informacion të plotë lidhur me:
vendimin dhe procedurën e ndjekur për zhvendosjen e bustit;
kushtet dhe vendndodhjen ku monumenti po ruhet;
masat konkrete të marra për mbrojtjen e tij;
përgjegjësinë institucionale dhe teknike për mirëmbajtjen e monumentit gjatë periudhës së punimeve;
procedurën që do të ndiqet për transportimin dhe rivendosjen e tij;
projektin përfundimtar të Lady Samuel’s Gardens;
afatet e parashikuara për rikthimin e monumentit;
si dhe çdo masë tjetër që garanton ruajtjen e integritetit dhe vlerës së tij historike e kulturore.
Shoqata do të kërkojë gjithashtu që, në përfundim të punimeve, busti të rikthehet në vendndodhjen e tij origjinale në përputhje me kushtet e lejes së planifikimit, dhe që hapësira përreth tij të jetë e sistemuar dhe e përshtatshme për një monument me këtë rëndësi.
ANGAZHIMI YNË DO TË VIJOJË
Shoqata Kulturore Mati do të vazhdojë ta ndjekë nga afër këtë çështje gjatë gjithë periudhës së punimeve.
Do të mbajmë kontakte me kompaninë përgjegjëse dhe institucionet përkatëse, do të kërkojmë informacion periodik mbi gjendjen e monumentit dhe do të ndjekim procesin deri në rikthimin e tij.
Qëllimi ynë është i qartë: ruajtja e bustit, mbrojtja e tij nga çdo dëmtim, garantimi i mirëmbajtjes së duhur dhe rikthimi i tij në vendin ku ka qenë i vendosur.
Ne nuk dëshirojmë të krijojmë keqkuptime apo të paragjykojmë procesin e punimeve. Përkundrazi, synimi ynë është një bashkëpunim konstruktiv, transparent dhe institucional me autoritetet britanike dhe kompaninë përgjegjëse, në mënyrë që ky simbol i rëndësishëm i historisë shqiptare të trajtohet me kujdesin dhe respektin që meriton.
Shoqata Kulturore Mati beson se ruajtja e trashëgimisë kulturore është përgjegjësi e përbashkët dhe se monumentet historike nuk u përkasin vetëm brezave të sotëm. Ato u përkasin edhe brezave që do të vijnë.
Për këtë arsye, do të vijojmë ta ndjekim këtë çështje me vëmendje dhe përgjegjësi, deri në rikthimin e bustit të Heroit Kombëtar Gjergj Kastrioti Skënderbeu në Lady Samuel’s Gardens. Gazeta e Londrës disponon të gjitha dokumentat dhe vendimet zyrtare në lidhje me projektin.
Shoqata Kulturore Mati – Londër në bashkëpunim me “Gazetën e Londrës”
