GAZETA E LONDRES – Rama ndryshon sërish qeverinë: Lamallari në Kryeministri, Demo merr drejtimin e Brendshëm
TIRANË – Kryeministri Edi Rama ka bërë të ditur një tjetër ndryshim në kabinetin qeveritar, duke riformatuar drejtimin e dy dikastereve të rëndësishme: Ministrisë së Brendshme dhe asaj që mbulon qeverisjen vendore.
Në një takim në zyrën e tij, Rama uli përballë dy ministrat, Besfort Lamallarin dhe Ervin Demon, për t’u komunikuar ndryshimet në detyrat e tyre.
Lamallari largohet nga drejtimi i Ministrisë së Brendshme për t’iu bashkuar ekipit të Kryeministrisë, ndërsa Ervin Demo, ministri i deritanishëm i Shtetit për Qeverisjen Vendore, merr drejtimin e Ministrisë së Brendshme. Me këtë lëvizje, Rama njoftoi gjithashtu integrimin e çështjeve të qeverisjes vendore brenda Ministrisë së Brendshme.
“Besforti nga drejtimi i Ministrisë së Brendshme do të kalojë në stolin tim bashkë me mua dhe ekipin këtu në Kryeministri”, deklaroi Rama.
Ndërsa për Demon tha:
“Ervini, ministri i deritanishëm i Pushtetit Vendor, do të mbulojë Ministrinë e Brendshme, ku do të integrojmë edhe çështjet vendore, diçka që nuk është e re për historikun e Ministrisë së Brendshme”.
Lamallari rikthehet në Kryeministri
Besfort Lamallari kishte marrë drejtimin e Ministrisë së Brendshme në mars 2026, pas një periudhe të gjatë në këtë dikaster si zëvendësministër.
Ai ishte bërë pjesë e qeverisë së Ramës gjatë mandatit të katërt, kur më 11 shtator 2025 u emërua ministër i Drejtësisë. Më pas, në mars të vitit 2026, mori drejtimin e Ministrisë së Brendshme.
Në momentin e largimit nga detyra, Lamallari falënderoi Kryeministrin për besimin e dhënë ndër vite.
“Shumë faleminderit për gjithë besimin e dhënë në këto 10 vjet. Jam munduar në maksimumin tim të mos ju zhgënjej kurrën e kurrës. Është kënaqësi dhe nder të vazhdoj rrugëtimin në krahun tuaj”, u shpreh ai.
Rama iu përgjigj duke vlerësuar punën e tij:
“Jo vetëm s’më ke zhgënjyer, por e ke bërë punën me integritet”.
Nga Ministria e Brendshme drejt një roli të ri në Kryeministri
Lëvizja e Lamallarit nuk shihet si një largim nga ekipi qeveritar, por si një zhvendosje në një rol të ri brenda Kryeministrisë.
Rama i ka atribuar atij një rol të rëndësishëm në strategjinë e re të komunikimit të qeverisë me qytetarët, e cila po zhvillohet përmes disa platformave.
“Ti je Besfort, je njeriu i duhur për të mbuluar një pjesë të kësaj pune”, tha Rama.
Sipas Kryeministrit, Lamallari do të ketë një rol kyç në këtë strukturë të re komunikimi, të lidhur edhe me skuadrën e “Besës” dhe “Pasqyrë Albania”.
Demo merr Ministrinë e Brendshme
Në krahun tjetër të ndryshimeve është Ervin Demo, i cili tashmë merr drejtimin e një prej dikastereve më të rëndësishme të qeverisë.
Demo u emërua Ministër i Shtetit për Qeverisjen Vendore në shtator 2025, ndërsa me ndryshimin e fundit kjo përgjegjësi integrohet në Ministrinë e Brendshme, të cilën ai do ta drejtojë.
Para se të hynte në qeveri, Demo ka shërbyer si Kryetar i Bashkisë së Beratit për një mandat, ndërsa më herët ka mbajtur detyrën e zëvendësministrit të Arsimit në vitet 2017–2018.
Në fjalën e tij të parë pas emërimit të ri, Demo e cilësoi detyrën si një përgjegjësi të madhe.
“Është përgjegjësi e madhe. Jam i bindur që do t’i çojmë përpara prioritetet e qeverisë”, tha ai.
Rama, nga ana e tij, vlerësoi punën e Demon në qeverisjen vendore, por e bëri të qartë se sfida e re do të jetë shumë më e madhe.
“Pushtetit Vendor i dhe një dimension tjetër. Te Punët e Brendshme është e treta e vërteta, make it or break it”, deklaroi Kryeministri.
Një tjetër ndryshim në kabinet
Ndryshimet në qeveri u paraprinë, herët mëngjesin e kësaj të premteje, nga betimi në Presidencë i ministres së re të Shëndetësisë, Klodiana Spahiu.
Spahiu mori detyrën pas dorëheqjes së Evis Salës, në fillim të shtatorit.
Kështu, brenda pak ditësh, kabineti Rama ka pësuar një tjetër riorganizim, me ndryshime në drejtimin e shëndetësisë, Ministrisë së Brendshme dhe strukturës së qeverisjes vendore.
Një riformatim me disa mesazhe
Ndryshimet e fundit nuk janë thjesht zëvendësime emrash. Ato sjellin edhe një riformatim të përgjegjësive brenda qeverisë, veçanërisht për Ministrinë e Brendshme, së cilës i shtohen edhe çështjet e qeverisjes vendore.
Në të njëjtën kohë, zhvendosja e Lamallarit në Kryeministri tregon se Rama synon të përdorë përvojën e tij në një tjetër front: komunikimin dhe ndërveprimin e drejtpërdrejtë të qeverisë me qytetarët.
Ndërsa për Ervin Demon nis tashmë një tjetër provë politike dhe administrative, në krye të një prej ministrive më të ekspozuara dhe më të rëndësishme të kabinetit.
Riorganizimi i fundit pritet të shihet në praktikë në javët dhe muajt në vijim, veçanërisht për mënyrën se si do të funksionojë integrimi i qeverisjes vendore me Ministrinë e Brendshme dhe roli i ri që do të marrë Lamallari në Kryeministri.
