GAZETA E LONDRES – Ekzekutohet pranë aeroportit të Rinasit ish-bashkëpunëtori i Emiljano Shullazit, Gilmando Dani
Afër një vit pas lirimit nga burgu, 47-vjeçari Gilmando Dani u ekzekutua të martën në dalje të aeroportit të Rinasit, në një zonë të populluar dhe me prani të shumë të forcave të policisë të Tiranës. Nga breshëria e plumbave mbeti i plagosur edhe 40-vjeçari Muçi Shaljani.
Ngjarja ndodhi rreth orës 14:20, kur automjeti me të cilin udhëtonte Dani u qëllua me armë zjarri nga persona ende të paidentifikuar. Sipas Policisë së Tiranës, Dani humbi jetën në vendngjarje, ndërsa Shaljani u transportua me urgjencë në spital dhe ndodhet në gjendje të rëndë.
Gilmando Dani ishte një emër i njohur për drejtësinë, me rekord të hershme kriminale. Ai konsiderohej një nga bashkëpuntorët më të afërt të Emiljano Shullazit, i dënuar për krime të rënda. Të dy u dënuan në nëntor të vitit 2018 nga Gjykata e Krimeve të Rënda për zhvatje pasurie, kërcënim dhe grup të strukturuar kriminal.
Dani u dënua me 12 vite burg dhe u lirua në tetor të vitit 2024, pasi kishte kryer dënimin.
