KMA NEWS / Kosova ka miratuar një rezolutë për lirimin e ish Komandantit të UÇK-së Ramush Haradinaj. Të gjitha grupet parlamentare në Kosovë kanë dhënë mbështetjen e tyre për rezolutën përmes së cilës kërkohet lirimi i kreut të AAK-së Ramush Haradinaj.
Nga 79 deputetë sa ishin në sallë 78 kanë qenë pro rezolutës, vetëm një ka qenë kundër.
Rezoluta parasheh edhe pezullimin e dialogut me Serbinë deri në lirimin e Haradinajt, bëjnë me dije mediat kosovare.
Pikat e rezolutës:
-Lirimi i pakusht i Ramush Haradinaj të ndodhë sa më shpejt dhe të konsiderohet detyre primare shtetërore.
-Pezullimi i dialogut me Serbinë deri në lirimin e Haradinjat.
-Qeveria të kërkojë nga BE që të pastrojë listat e fletë-arresteve nga Serbia për qytetarët e Kosovës.
-Qeveria dhe institucionet e Kosovës të marrin veprimin dhe të informojë shtetet tjera që refuzon juridiksionin e një anshëm të Serbisë.
Rezolutën e ka mbështetur edhe Kuvendi i Shqipërisë
Kuvendi i Shqipërisë ka shprehur mbështetjen për rezolutën e miratuar nga Kuvendi i Kosovës, për lirimin e menjëhershëm të kreut të AAK-së, Ramush Haradinaj.
“Dua të përshëndes edhe në emrin tuaj dhe të gjithë Kuvendit të Shqipërisë, Rezolutën e sapo miratuar nga Parlamenti i Kosovës që kërkon lirimin pa kushte të z. Haradinaj”, ka deklaruar kryetari Ilir Meta në përfundim të seancës plenare.
Me nismën e partisë Aleanca për Ardhmërinë e Kosovës, Kuvendi i Kosovës miratoi këtë të enjte një rezolutë që kërkon lirimin pa kushte dhe sa më shpejt të ish-kryeministrit të Kosovës, duke e konsideruar atë si detyrë primare shtetërore.
