KMA NEWS / Ka nisur koncerti festiv në Vatikan me rastin e shenjtërimit të Nënë Terezës. Atje marrin pjesë artistë të famshëm me origjinë shqiptare.
Koncerti madhështor kushtuar Nënë Terezës, me rastin e shenjtërimit, mbahet në “Basilica di San Paolo Fuori le mura”, në Vatikan, ku interpretojnë artistët shqiptarë më të njohur në mbarë botën.
Në koncert është interpretuar himni i Nënë Terezës “Valsi Hyjnor” me muzikë të Lorenc Antonit e me vargjet e poezisë “Lamtumirë” të shkruar nga Nënë Tereza gjatë udhëtimit të saj nga Irlanda në Kalkutë.
Himni është kënduar nga soprano Inva Mula e shoqëruar nga Filarmonia dhe kori i Kosovës me orkestrantë nga Shqipëria e Maqedonia.
Pjesëmarrës në këtë aktivitetet janë emra të njohur të muzikës botërore si këngëtarja me origjinë nga Kosova, Rita Ora, sopranot e famshme, Inva Mula, Ermonela Jaho etj. Të ftuar janë edhe Lorik Cana dhe figura të tjera shqiptare të njohura në mbarë botën.
Ndërkohë, Këngëtarja Rita Ora do të këndojë së bashku me tenorin Saimir Pirgu këngën “What Child is This”. Nga ana tjetër, këngëtarja Ermonela Jaho do të këndojë himin “Panis Angelicus” (Bukë për engjëjt), një liturgji e shkruar nga Shën Tomazo d’Aquino.
Në koncert janë të pranishëm edhe krerët e lartë të shtetit shqiptarë, përkatësisht Presidenti Bujar Nishani, kryeministri Edi Rama, kryetari i Kuvendit, Ilir Meta, kreu i Partisë Demokratike, Lulzim Basha, ish-kryeministri Sali Berisha, etj.
