GAZETA E LONDRES – Tirana në qendër të vëmendjes europiane: Udhëheqësit e kontinentit mblidhen për Samitin e Komunitetit Politik Europian
Sot, Tirana shndërrohet në kryeqendrën politike të Evropës. Kryeministra, presidentë dhe zyrtarët më të lartë të 47 shteteve të kontinentit do të mblidhen në zemër të Shqipërisë për të marrë pjesë në Samitin e Komunitetit Politik Europian—një forum i rëndësishëm që synon të forcojë dialogun, bashkëpunimin dhe sigurinë në Evropë.
Një ngjarje e këtij niveli do të bashkojë liderë nga Londra në Kiev, nga Oslo në Ankara, për të diskutuar sfidat më të mprehta të momentit, që nga siguria dhe stabiliteti, deri te energjia, teknologjia dhe mbrojtja e demokracisë.
Për mbarëvajtjen e këtij aktiviteti madhor, Policia e Shtetit ka ndërmarrë një sërë masash sigurie dhe organizimi. Prej ditës së enjte, nga ora 08:00 deri në 24:00, janë vendosur kufizime të lëvizjes për automjetet në disa akse rrugore kyçe që lidhen me itinerarin e delegacioneve: Aeroporti “Nënë Tereza” – Thumanë – Kashar – Unaza e Re – Rruga e Elbasanit – deri në sheshin “Skënderbej”, ku do të zhvillohet aktiviteti qendror.
Ky kufizim do të vijojë edhe gjatë ditës së premte, nga ora 06:30 deri në mesditë. Gjatë kalimit të delegacioneve, rrugët do të bllokohen në të dyja kahet. Policia u bën thirrje qytetarëve që të shmangin lëvizjet në këto zona dhe të përdorin rrugët alternative, si rruga dytësore Tiranë–Qafë Kashar–Rinas dhe Unaza Veriore përmes Paskuqanit, Kamzës dhe Laknasit.
Për sa i përket institucioneve jetësore, si spitali “Shefqet Ndroqi”, hyrja dhe dalja në këtë qendër do të ketë devijime të përkohshme në përputhje me oraret e kalimit të delegacioneve. Ndalohet gjithashtu parkimi i mjeteve, përfshirë edhe nëntokësorin në sheshin “Skënderbej”.
Ndërkohë, në një klimë politike të tensionuar, ende pa u certifikuar zyrtarisht rezultati i zgjedhjeve të 11 majit, ish-kryeministri Sali Berisha ka paralajmëruar një protestë në Bulevardin “Zogu I”, me pretendimin për manipulim të votës nga Partia Socialiste. Edhe pse Policia e Shtetit ka refuzuar kërkesën për zhvillimin e protestës, Partia Demokratike shfaqet e vendosur për të mbajtur tubimin.
Një ditë e ngarkuar në Tiranë, me diplomacinë dhe politikën kombëtare që përplasen në një ditë me ngjarje të shumta dhe të ndjeshme për vendin.
