GAZETA E LONDRES – Video/ Burreli do të festojë Krishtlindjet dhe Vitin e Ri pa sisterna mbi taraca
Ky është një lajm shumë i bukur dhe shumë i rëndësishëm për Burrelin, qytetin e luleve dhe të mollëve! Djepin e historisë, kulturës dhe dijes! Vendin e letërsisë dhe trimërisë, të tradidateve dhe bujarisë! Vendin e prodhimit të barutit dhe shtetforminit!
Qyteti i Burrelit, pas 34 vitesh, do të ketë ujë të pijshëm 24 orë në ditë, dhe këtë vit, Krishtlindjet dhe Vitin e Ri do t’i festojë pa sisternat e ujit mbi taraca, që kanë rënduar jo vetëm pallatet, por edhe i kanë zënë frymën qytetit.
Falë punës këmbëngulëse të Bashkisë së Matit, është bërë e mundur lidhja e të gjithë abonentëve me rrjetin e qytetit, duke siguruar ujë të pijshëm pa ndërprerje.
Kryebashkiaku i Matit, zoti Agron Malaj, i ka bërë thirrje qytetarëve të Burrelit që të heqin sisternat e ujit nga taracat e pallateve, duke vendosur një afat deri në muajin dhjetor. Kreu i bashkisë gjithashtu njoftoi se qytetarët të cilët, për arsye të ndryshme, nuk mund t’i heqin vetë sisternat, mund t’i drejtohen Bashkisë, e cila do t’u vijë në ndihmë sipas rregullave të vendosura.
Kështu, Burreli, për herë të parë në sistemin pluralist 34-vjeçar, do të festojë Krishtlindjet dhe Vitin e Ri jo vetëm me ujë të pijshëm 24 orë pa ndërprerje, por edhe pa sisterna, duke shtuar bukurinë e qytetit dhe lehtësuar një barrë të madhe për qytetarët.
