GAZETA E LONDRES – Ushtar i Ushtrisë Amerikane arrestohet në Britani, dyshohet për spiunazh në favor të Rusisë
Një ushtar 41-vjeçar i Ushtrisë së Shteteve të Bashkuara është arrestuar në Mbretërinë e Bashkuar, nën dyshimin për spiunazh në favor të Rusisë, bëri të ditur Policia Kundër Terrorizmit në Londër.
Arrestimi u krye të martën, në afërsi të qytetit Gloucester, në qarkun e Gloucestershire.
Sipas policisë, ushtari është ndaluar në bazë të neneve 1 dhe 3 të Aktit të Sigurisë Kombëtare të vitit 2023 (National Security Act 2023). Neni 1 lidhet me marrjen ose zbulimin e informacionit të mbrojtur, ndërsa neni 3 parashikon veprën penale të ndihmës ndaj një shërbimi të inteligjencës së huaj.
Në kuadër të hetimeve, oficerët e policisë po kryejnë kontrolle në dy lokacione në Gloucestershire.
Sipas informacioneve të siguruara nga BBC, ushtari ishte i dislokuar në kazermat Imjin, në Innsworth të Gloucestershire. Këto kazerma shërbejnë si seli e Korpusit Aleat të Reagimit të Shpejtë të NATO-s (ARRC), një strukturë me rëndësi strategjike dhe operacionale për Aleancën Atlantike.
Policia Kundër Terrorizmit në Londër bëri të ditur se arrestimi nuk ka lidhje me ndonjë hetim tjetër që është aktualisht në zhvillim.
Drejtori i FBI-së, Kash Patel, e cilësoi arrestimin si një zhvillim të rëndësishëm, duke theksuar seriozitetin e dyshimeve për spiunazh.
“Ky arrestim i rëndësishëm përfshin akuza për spiunazh, çështje që përbën shqetësimin më të madh për Shtetet e Bashkuara dhe aleatët tanë”, deklaroi Patel.
Ai shtoi se FBI-ja do të vazhdojë të mbështesë hetimin dhe paralajmëroi se nuk do të ketë tolerancë ndaj personave që shkelin betimin ndaj Shteteve të Bashkuara dhe vënë në rrezik sigurinë kombëtare të vendit dhe të partnerëve të tij.
Nga ana tjetër, zëvendëskomisionerja ndihmëse Vicki Evans, përfaqësuese e Policisë Kundër Terrorizmit në Londër, e cilësoi arrestimin si një operacion të rëndësishëm.
“Dyshimet janë serioze dhe hetimi ynë është ende në vazhdim”, u shpreh ajo.
Ushtari, identiteti i të cilit nuk është bërë publik, mbahet aktualisht në paraburgim në një komisariat policie në Londër.
Në bazë të Aktit të Sigurisë Kombëtare të vitit 2023, policia ka të drejtë ta mbajë të ndaluarin deri në 14 ditë pa e akuzuar zyrtarisht, në përputhje me procedurat ligjore përkatëse.
Gjenerali i brigadës Sean Stinchon, komandant i Komandës së Kundërzbulimit të Ushtrisë Amerikane, deklaroi se ky rast dëshmon rrezikun që paraqesin kërcënimet e brendshme për sigurinë kombëtare.
“Sjellja e dyshuar e një ushtari të nivelit të lartë, të cilit i janë besuar informacione sensitive, është një kujtesë e fortë se kërcënimet që vijnë nga brenda janë reale dhe të vazhdueshme”, deklaroi ai.
Gjenerali u bëri thirrje qytetarëve dhe personelit ushtarak që të raportojnë çdo veprimtari të dyshimtë pranë strukturave lokale të kundërzbulimit.
